自從慧峯（8228）高調話進軍本地電力市場，炒咗一大輪之後，陸續有公司話想進軍本地電力市場。至於慧峯有幾堅，可行性有幾高，小初呢類凡夫俗子真係矇查查，不過就知道幕後炒家大把錢，炒得㷫烚烚之時，自然有人信兼會跟進。
另外一間話參與本港電力市場的公司，就係剛剛參與系內重組的威華達（622），隻股早排炒過一輪，噚日又見異動，最矚目係有一手45球造0.75元的大手成交，經紀陳話聽到有強者接貨，似乎重有古仔跟尾。威華達昨日升6.25％，收0.85元，成交4051萬元。
威華達年前搞過幾次供股，去年年底佢阿媽百仕達（1168）又搞過一次全面收購，一度搞到公眾持股量不足，擺明街貨唔慌多。
最近威華達參與百仕達系內公司重組，將發行總值17.53億元的新股向百仕達購入百江燃氣（8132）股權，大搞能源生意。由於隻股街貨疏，若果有消息出現，再加上有心人推波助瀾，要炒高冇乜難度。
慕容小初