政府猛話香港經濟市道轉好！𠵱家只係4月中，但旺角好多AV舖都話「五窮、六絕」效應已經提前出現！加上好多大代理都唔想掟新貨落場，淡季嘛！費事去貨慢，到暑假變「舊貨」又迫住落價，咁咪入晒……肉！呢期AV舖都係「靜靜雞」玩減價，執平貨係時候！
文：AVMAN
30"LCDTV$8,980新低價
話說港聞版早兩日話，繼中日韓LCDTV冧價後，有歐洲代表都嚟露番手，30"低賣$9,980！冇錯嗰個係英國老牌子，但據稱呢部LCDTV係「白皮黃心」，即中國製造。其實近年好多大陸機都興玩「借殼上市」，非行內人，真係幾難分辨！講到平，最近有部KLT-3012，一樣30"LCDTV，價位$8,980，剛好平多一千；牌子Kolin喺香港雖名不見經傳，其實係台灣土炮三大廠之一！16:9、光度700cd/m2、對比度750:1、解像度1,280×768（HDReady）、可視角度170°、反應時間16ms，相對一般祖國機，都算不會被比下去！基本影音插頭有齊（連DVI-D/VGA都有），當中最正係個內置TVTuner，做得非常好，睇電視一流！不過最強係玩2年Panel及零件上門維修，冇咁上下「質地」，點敢玩全包宴呀！
SONYT7閃電降價
話說上星期尾，SONY新超薄大芒DCT7以獨家行貨推出，至「獨」之處乃香港屬全球首賣點，而且行貨嗰邊對出貨同價格控制都非常嚴謹（$3,980），邊間賣得、邊間唔畀貨都諗過度過！不過香港水貨佬真係石頭裏都榨出血來！今個星期初T7水貨恐怖登場，祖籍何處？場內Sales都話估佢唔到！不過齊料中、英文介面及震撼價$3,380，就更為撲朔迷離。幸好來貨唔多，對市場衝擊不大！據知因為是次「不明水貨」事件，行貨嗰邊馬上做嘢！好些舖頭已將行貨價調節到$3,890，跟機送128MBMSDuo，變相平多$300，而且行貨有保養照住，買行定買水？唔使我教啦啩！
PENTAXOptioX平賣$1,980
又係水貨佬事件！PENTAXOptioX都係近期熱機，500萬像素、3×PENTAX獨門SMC靚鏡、2"大芒，加埋近年較少見嘅扭擰機身設計！好多Sales都話唔使同啲客Sell一輪功能或講一輪「古仔」，大家都會乖乖去Cashier畀錢！行價現時標緊$2,480，水貨創新低價$1,980！差價成$500，都幾犀利吓！據知水機來源地係歐洲，有中、英文介面，行貨真係幾受壓！
售賣點：華仁會
電話：23980280
地址：旺角花園街75-77號花園商業大廈5-6樓