曾志偉投資三千萬的連鎖髮型屋，位於上環的第三間分店昨日舉行開幕禮，一班髮型屋員工更特別為他舉行生日派對，慶祝志偉五十二歲生日。
志偉說：「之前兩間都冇搞開幕剪綵，今日因為撞啱我生日，順便搞埋，舊嗰兩間都係上樓舖，生意唔錯，剪髮十分鐘五十蚊，一日有成百個客，都做唔切，今次呢間係第一間地舖，我目標係開六十間，再賣特許經營，可以嘅話再去北京、上海、廣州、深圳開埋。」
提到生日願望，志偉說：「我希望自己同身邊人健康快樂，今晚會搞個生日齋宴，之後就同班酒友慶祝，我之前已經叫所有朋友唔好送禮物畀我，叫佢哋捐錢，我先後去咗四個生日party，籌到約七萬蚊，全部會捐去畀慈善機構。」
採訪：何永寧
攝影：陳偉權