陳松伶日前拍攝新劇中一幕學揸電單車的戲份，原本她以為扮型女車手，怎知原來是「女學神」，還要穿地盤佬味十足的螢光背心和戴細小頭盔。松松還表示戴上頭盔後只能向前望，看不到兩邊景物。
陳松伶、陳敏之和鄭嘉穎日前在黃竹坑拍攝無綫新劇《飛短留長父子兵》。劇情講述松松學揸電單車，雖然她沒有電單車牌，但姿勢總算有板有眼，松松說：「今日第一次揸電單車，我一直覺得女仔揸真係好型，但我覺得自己今日係學神就冇咁型，加上件背心好似地盤佬咁，好薯囉！」
原來松松一直以為飾演技術高明的電單車手，她說：「我之前睇劇本以為自己手車好叻，可以揸吓HarleyDavidson扮吓型啦，點知原來係學神。」松松表示一直想學電單車，但始終未有時間，她說：「我好想學揸綿羊仔，因為覺得好可愛，今日順便學吓電單車，好彩拍得好順利。」松松又說：「個頭盔重細過我個頭，感覺好搞笑，我雙眼都望唔到兩邊，只係可以向前望，好似馬眼咁。」
劇中松松跟陳敏之和鄭嘉穎發展一段錯綜複雜的三角關係，陳敏之表示曾試過因第三者而跟男友分手，她說：「讀書嗰陣男朋友有咗第二個而同我分手，呢段感情真係影響咗我一生，所以我對婚姻唔係好大信心，我諗都唔會結婚，最多同居。」
採訪：王崇穎
攝影：陳偉權
