點解對面隻貓又乖又識擔拖鞋，我嗰隻就淨係識打爛嘢？時也命也，要奪回貓心，查實最重要係夾埋人貓星座，咁就天地人和！首先搵出貓貓的出生日期，計算方法和人類星座一樣。
記者：陳慧敏 攝影：梁細權 Model：Chrises（d8）
真實個案Check真啲
貓咪：JoJo（雙子座）
主人：Chrises（水瓶座）
根據貓星座的結論，這個人貓組合係火星撞地球。現場所見，Chrises幾次想抱「友善的」JoJo，JoJo都不客氣伸她一腳。Chrises：「我用絲帶引佢玩，佢匿喺櫈底眼睩睩望好耐都唔撲出嚟，好攰呀！」勁準！
山羊座老餅貓
乖，但悶。是隻嚴肅、木訥有點老餅的貓咪，但聽話又有紀律為你省下不少麻煩。
最啱Feel主人：金牛座、處女座
最冇Feel主人：白羊座、雙子座
水瓶座思想貓
有創意，但就諗多過做。你會見佢準備好耐，都不行動，又常有失控舉動。
最啱Feel主人：雙子座、天秤座
最冇Feel主人：天蠍座
雙魚座感性貓
感應力強，很能了解主人的情緒。但睡姿就普遍衰相。優點和缺點都係太依賴主人。
最啱Feel主人：金牛座、巨蟹座
最冇Feel主人：雙子座、處女座
白羊座戰鬥貓
健力野性貓愛撩是鬥非，堪稱貓之東方不敗，要小心屋內鞋子花瓶盆栽小命不保。
最啱Feel主人：白羊座、獅子座
最冇Feel主人：巨蟹座、處女座
金牛座鄉村貓
夠嗲，日日懶懶閒曬太陽，絕技狂風掃貓飯，但對主人一日不見如隔三秋。
最啱Feel主人：金牛座、巨蟹座
最冇Feel主人：八面玲瓏冇人唔妥
雙子座好奇貓
愛做運動體態輕盈，但四肢發達頭腦簡單，一味睇電視，會鑽入雪櫃衣櫥等你搵。
最啱Feel主人：雙子座、天秤座
最冇Feel主人：巨蟹座、水瓶座
巨蟹座家居貓
我很醜，但我很溫柔，對所有貓族博愛。警覺性高容易緊張，所以只愛主人一個人類。
最啱Feel主人：金牛座、巨蟹座
最冇Feel主人：天秤座、白羊座
獅子座貴族貓
愛熱鬧，主動撩主人玩。自信滿瀉，會搶你王座瞓你張床，正宗「貓仔」大過主人婆。
最啱Feel主人：白羊座、天秤座
最冇Feel主人：處女座、金牛座
處女座淑女貓
乖巧又自律，極愛乾淨，但就容易緊張。腸胃偏弱所以瘦蜢蜢，受壓時會成日甩毛。
最啱Feel主人：金牛座、處女座
最冇Feel主人：雙子座、人馬座
天秤座交際貓
熱愛群居與「世界大同」的外交家，任摸唔嬲，跟狗、雀都相處融洽。不過就懶到暈。
最啱Feel主人：白羊座、金牛座
最冇Feel主人：巨蟹座、處女座
天蠍座孤獨貓
夜蒲忍者貓。打獵百發百中，但獨佔慾極強，做主人的休想另有新歡，否則……
最啱Feel主人：巨蟹座、天蠍座
最冇Feel主人：雙子座、獅子座
人馬座浪子貓
健康有活力，體格強健，是隻愛跳高跳遠的浪子貓，但論論盡盡成日打爛嘢。
最啱Feel主人：白羊座、獅子座
最冇Feel主人：巨蟹座、處女座
