金管局副總裁陳德霖（NormanChan）辭職不幹，理由係mid-lifesabbatical，全個中環，幾難搵到人信。好多猜測話佢會做證監會CEO，代替沈聯濤，但沈聯濤離開金管局去證監會之時，邊度有提早離職過冷河呀？特區政府已經搵咗獵頭公司搵人，沈聯濤離職已成定局，假如放多啲聲氣話陳德霖去做，相信好多人都會打退堂鼓，費事同佢爭。你估做陪跑好過癮咩，非常之冇癮就真，當年政府搵楊啟彥做九鐵CEO，獵頭公司煞有介事，左丁山一位老友一時不察，以為自己好有機會，點知做咗「陪跑」，嬲到今日！
另有一說，話許仕仁係陳德霖之貴人，許仕仁做咗政務司之後，會委之以重任，因為佢好賞識陳德霖，故此講掂老友記任志剛放人喎。呢啲咁高級嘅人士動向，我哋知啲唔知啲，好容易估錯隔籬，不過陳先生辭職之理由甚為新鮮，因此更加多人猜度。譬如陳先生話好多朋友在六十歲退休，但六十歲之時，已經冇力去旅行或者行山，故此五十歲就唔do，更加容易轉變人生方向。講得咁鬼浪漫，還像有赤子之心，令人羨慕，但既然夫妻恩愛，點解陳太唔辭埋強積金管理局行政總監一職，齊齊去追求浪漫，喺人生下半場再闖新道路呢？唔通五十歲男人可以追求新刺激，年紀差唔多之太太仍然要捱世界？
地產代理監管局行政總裁陳佩珊與陳德霖都係中文大學畢業生，陳佩珊本來係ＡＯ，睇完一本書《TheSecondHalf》（下半場）之後，辭去經濟發展及勞工局之職位，唔要終身長工，改打「合約工」，冒上更大風險，或者中大學生修讀通識教育，入心入肺，終身不忘，故此四十五歲以後，生活無憂之際，就會「浪漫」情懷突發。好一句mid-lifesabbatical，左丁山永遠都追求不到的奢侈！