美股近日好淡埋身肉搏，前日好友被困埋繩角打唔低，臨尾展開大反攻，杜指由最多跌87點，變成倒升59點收市，氣勢當堂唔同晒，當大家以為好友周三晚會乘勢追擊，點知好友又捱一拳重擊，杜指大跌104點，收10403，又再次被人迫埋繩角。
杜指10360是好友短期最重要防線，近期雖兩度力挽狂瀾，但形態上則似營造頭肩頂的右肩，一旦確認跌穿頸線，量度跌幅要見9800水平。但近期大戶唱高油價後食胡，過往資金多數流入股市，推高股價食胡後再轉投油市，周而復始玩咗大半年。如果今次又是舊路重遊，美股將展開反彈，繼續在10300至10900區域反覆上落。
港股昨日未受美股大跌影響，恒指初段跌近13700已跌唔落，最後跌幅收窄至27點，收13772。即月期指幾乎收復全部失地，僅跌1點，高水43點。睇嚟大戶要砌上的信心頗堅定，如果美股守得住10360支持位，港股稍後將上試14100水平。老友重話只要睇吓噚日支撐大市係乜嘢股份，就知道幕後有幾堅，短期可以唔造好，但就咪拗頸造淡。
睇圖長實（001）確係頗吸引，昨升0.50元，收72.50元。股價剛收停在今年1月降軌之前，但9RSI已率先升破降軌，通常稍後股價亦跟隨突破，若確認破位，將見75-78元。
和黃（013）更是已微破同期降軌，將挑戰去年12月高位73.50元，是目前最強勢的大藍籌。長和勢強，再加埋滙控（005）有上升水位，港股可看高一線。
趙飛雲對美股始終有戒心，因此原先13700博恒指Call輪的計劃冇執行，在睇清杜指能否守住10360才決定博好定博淡。
趙飛雲