日本萬人迷木村拓哉啱啱喺日本女性雜誌《an．an》每年舉辦嘅「我最喜愛男星」選舉中，成為十二連霸主，不過眨下眼佢喺另一日本雜誌《TVBros.》所搞嘅「我最討厭男士」選舉中，竟然慘成亞軍。
《TVBros.》早前搵咗六百七十二名女性讀者，包括娛樂圈有關人士以及編輯等，投票選出「我最討厭男士」，當中重有唔少抵死語錄。投木村一票嘅讀者話木村經常喺電視上扮型，佢嘅遣詞用字正係日本時下年輕人講嘢愈嚟愈冇禮貌嘅元兇。被選為冠軍嘅係今年三十二歲嘅日本I.T.公司Livedoor社長堀江貴文，佢早前以另類大膽手法企圖收購日本富士電視台，雖然未能成功，但已經觸怒唔少保守嘅日本人，而堀江嘅口頭禪就係「世上冇嘢係錢買唔到，包括女人同人心」，難怪成為犯眾憎人物。
第三位係早前因布袋寅泰同高岡早紀搞婚外情而戴綠帽嘅保坂尚輝，雖然保坂係事件受害人，但由於佢態度囂張，未能獲得大眾同情。過氣流行歌天王米高積遜（MichaelJackson）亦打入第七位，讀者話唔敢直視米高嘅尊容。