患有第三期肝癌的羅家英現正在內地橫店拍攝劇集《方德與苗翠花》，早前曾做手術的他表示至今傷口仍隱隱作痛。不過同劇的譚耀文則表示毋須多照顧對方，因家英哥一埋位就龍精虎猛，看劇本又過目不忘，令譚耀文十分敬佩。
羅家英、譚耀文和郭藹明正在橫店拍劇集《方德與苗翠花》，扮演苗翠花父親苗顯的家英哥全情投入拍攝，據知他除吃雲芝進補，亦喝由牛𦟌、紅蘿蔔和白蘿蔔等煲成的五行茶補肝。
昨日記者聯絡上家英哥，對於目前的開工情況，他透過長途電話說：「過到嚟一切都幾好，天氣就乍暖還寒，我都帶少咗件冷衫。食嘢方面就自己煮，都唔係食好多，好清淡，食吓啲雲芝營養嘢。」早前家英哥曾接受切除癌細胞手術，他不諱言至今傷口仍隱隱作痛，他說：「重痛痛哋㗎，好似有嚿嘢頂住咁。」
未知其女友汪明荃會否前來探班？家英哥說：「唔會，佢要拍劇呀，呢段日子都唔會上嚟，我都要到六月尾拍晒至返香港。」
而譚耀文昨亦在長途電話中說：「我同家英哥好多對手戲，但唔使錫住佢，同佢做對手戲點可以鬆懈？佢係前輩嚟㗎，我見佢一埋位就精神好好，唔使埋位時佢就搵個唔曬嘅位置閉目養神，佢重教我打功夫㖭。我以前學過詠春，呢排家英哥又有學，趁有時間，我都會跟佢學吓嘢。」
問阿譚需不需要特別照顧家英哥？他說：「唔使，佢冇病人嘅感覺，同以前嘅家英哥冇分別。
「我好有信心佢會冇事，佢好有勇氣，我哋成組人都好尊敬佢。我覺得匿喺屋企重衰，個人會胡思亂想，見到家英哥更加證實一樣嘢，就係男人有工作，可以打死好多細胞。佢睇劇本可以過目不忘，所以我朝朝開工見到佢，都要飲咖啡提神呀。」
採訪：朱倬誼
