股市難估，事隔一日，成個市氣氛唔同晒。早兩日，重係「死咕咕」，噚日就突然間變得生龍活虎，藍籌股嘅表現最出色，一路係咁掃，結果就掃到全日高收，恒指大升141點，收13799，期指重勁，衝破13800大關，高收13816，大升186點，由低水而變為高水。
一直以來，都叫話唔好睇淡個市，諗住佢會調整一吓，就趁機會買貨，迎接下一個大升浪。噚日出現咗突破性升勢，想買平貨，恐怕難以如願以償。早輪講過，拖到4月中，中期調整嘅時間亦已足夠（由去年12月初開始已4個多月），現時恒指已重上10日線（13589）、20日線（13666）同50日線（13787），若守穩50日線之上，新升浪便可確認。
新樓盤有大戶掃貨，刺激地產股全面上揚，新鴻基地產（016）同盈大地產（432）就最突出，前者收72.50元，升1.50元；後者收2.525元，升7.5仙。長實（001）同恒地（012）亦分別有1.0元同0.6元進帳。
前日大插插嘅中信21世紀（241），噚日就有大盤沿途護航，由開市初段最低的2.80元掃到上3.35元，且每個價位買盤都「球球」聲，充份顯示幕後人嘅信心；收市3.275元，升0.35元，升幅近12%。噚日收到料，話有一單收益涉及天文數字嘅項目，好快會有聲氣，難怪啲買盤咁勁。
聯洲國際（048）在1.70元至1.90元間整固已個多月，由低位回升後，近日走勢形成旗形，若升破1.86元阻力，短期目標指向2.10元，中線以長達半年的大圓底衡量，上升目標指向2.50元。
聯洲主要業係設計及全球銷售珠寶首飾、鐘表時計同皮革製品，經銷品牌組合48個，目前主要市場在歐洲，未來將會大力拓展中國、日本同美國市場。
05年度（5月年結）的上半年，聯洲營業額16.7億元，升9%，獲利8869萬元，升22%，每股盈利7.51仙，預測全年盈利1.82億元，每股盈利15.1仙，預測PE12.1倍，相比國際同業的16至27倍，例如PoloRalphLaurenCorp.的15.8倍、BurberryGroupPlc的19.7倍，以及Richemont的27.3倍，都明顯的大為偏低。大華繼顯發表報告，推介買入，以06年預期13倍PE計，目標價為3.20元。
郭兆誠