近期焦點除咗SCEH公布PSP行貨發售外，包羅萬有嘅周邊配件亦係市場上熱炒Items。好似到𠵱家重斷緊貨嘅PotterPSP袋咁，土炮生產商抄款都有唔錯銷路，而MSDuo就更加厲害，1GB容量炒到成$1,300仍有價有市。不過好多客仔都發覺質素冇之前PSP嘅示範UMD入面啲片咁靚，其實除咗片源本身都要高質素，再加上低壓縮率先可以有理想效果。要睇高質影片重有更簡單嘅方法；原定下星期日本會正式推出一系列PSP專用嘅UMD電影，鐵人收到風將有機會早幾日派貨，話唔定呢個禮拜尾或下星期頭會有貨見街，同期重有幾套大片登場，包括《生化危機1&2》、《蜘蛛俠2》、《中島美嘉MTV》等，定價約$180，估計頭批到港水貨UMD會稍上到$200，影迷要留意喇。
文：打機鐵人
闊別10年再遇《天外魔境》
原定於PC-Engine後繼機種PC-FX上推出嘅《天外魔境3》，雖當年計劃胎死腹中，不過經歷10年後，新作終於喺PS2上復活。主力賣點仍由《櫻花大戰》靈魂人物廣井王子親自操刀，喺現今高科技聲畫底下，應有一番作為，老一輩機迷不妨買隻支持吓。
XBOX新Game1+1優惠
XBOX功夫動作遊戲《翡翠帝國》，將會喺今日派街（$299），呢款Game集合開發商BioWare到目前為止最精采嘅動畫技術，遊戲內所有怪物以外的角色都以動態捕捉技術（MotionCapture）製作，又以XBOX最新次世代引擎開發，再加上融入了格鬥元素，令30小時以上的遊戲時間充滿互動效果。灣仔DreamStore將會做優惠，凡手持《蘋果》今日本版到DreamStore，連同以下一款遊戲購買，可獲$50折扣優惠。
指定遊戲：《Fable》/《RainbowSix3》/《縱橫諜海：潘多拉計劃》/《PGR2》/《終極生死格鬥》
優惠店：DreamStore
地址：灣仔東方188商場256號舖
