英國老牌男歌手洛史釗活（RodStewart）嘅底褲，前日竟然喺澳洲悉尼一間醫院入面出現，當然唔係佢唔記得攞，而係洛史釗活特別捐出一條簽咗佢大名嘅底褲作慈善拍賣。
六十歲嘅洛史釗活，早幾日先唱完美國一個慈善基金主辦嘅演唱會，𠵱家又送出簽名底褲做拍賣，都算熱心公益咯。原來洛史釗活呢條底褲，會擺喺網上拍賣，而得到嘅收益，就會用嚟治療同研究男性大敵睪丸癌。而洛史釗活除咗簽名外，重喺上面寫咗叫大家小心嘅字句，藉此喚醒大家對呢個病嘅認識，以及鼓勵男士定期進行檢查。
其實洛史釗活係今次慈善拍賣入面，參與嘅三十個名人之一，除咗佢之外，重有好多各地名人、藝人等，將佢哋嘅簽名底褲，放喺澳洲悉尼嘅RoyalPrinceAlfred醫院展覽。
台灣名模林志玲噚日到日本東京出席宣傳活動，宣布正式加盟「奧斯卡推廣」，呢間係日本最大、最出名嘅模特兒同演員經紀公司，正式進軍影視圈，成為米倉涼子同菊川怜嘅小師妹。林志玲喺記者會上用好流利嘅日文講出自己嘅感受，話自己好希望喺演藝圈有更大嘅發展機會。
周杰倫早前喺上海宣傳，俾人影到佢去夜店消遣，有人安排一位十六歲嘅女仔坐喺周杰倫身邊。周杰倫女友侯佩岑就力撐話：「那是他的工作之一。」周杰倫所屬嘅阿爾發唱片表示，當晚係林建岳請客，周杰倫以為要去酒吧，諗唔到係夜總會，佢話一齊坐嘅只係唱片公司嘅工作人員。
房祖名前緋聞女友戴佩妮噚日喺台灣出席下月十四日嘅演唱會宣傳，唱片公司幫佢搞咗一個類似出嫁嘅儀式，佢着咗紅色禮服出場，好鬼搶眼。戴佩妮一出場就拎住茶盤敬茶，佢話：「這件禮服原本是酥胸半露的設計，但我真的沒有，只好多穿一件tubetop。」
早年憑電影《一一》贏咗法國康城影展最佳導演獎嘅台灣導演楊德昌，獲得今年康城影展主辦單位邀請，擔任下個月舉行嘅康城影展短片項目嘅評審團主席，主辦單位前日公布，楊德昌同其他評審，會喺二十二號嘅頒獎禮上頒發最佳短片獎。
今日係曾志偉五十二歲生日，佢開設嘅第三間髮型屋亦都喺今日開張，可謂雙喜臨門。志偉日前預祝生日時，剛好在食店遇上方中信同佢女友莫可欣、爾冬陞、陳慶嘉同趙文卓等，而志偉喺切蛋糕許願時就話希望所識嘅朋友都身體健康。
吳卓羲噚日去新城電台接受訪問，宣傳新劇，對於近日嘅反日潮，以致無綫原本打算繼《大長今》後播嘅日劇《大奧》，𠵱家都抽起咗，佢話：「我覺得香港人唔會咁激，就算反日都可以係和平示威，唔好搗亂或者整亂日本舖。我唔會刻意罷買日貨。」
