中信21世紀（241）前日突然一度急跌至2.35元，尾市掃番上2.925元收市。隻股噚日再升11.97％，彈番上3.275元收市，短時間內股價上落可以相差成1蚊，真係心血少啲都頂唔順。小初雖然愛冒險，但隻股抽上抽落得咁勁，自問真係玩唔起。
經紀黃噚日叫小初留意即將在下周一公布04年全年業績嘅精電國際（710），佢話自從精電創辦人大幅減持股權兼引入新行政總裁後，公司頻頻與證券界會面，強調並唔係賣盤，原來管理層雖無意引退，但個別芬佬似乎仍然擔心，導致沽盤源源不絕，由9元水平跌到現時的7.60元，跌幅唔算細。
經紀黃話，分析員其實睇好精電業績表現，如果今次業績當真交得準，兼且派息佳，可以對得住江東父老，芬佬或者肯回心轉意都未定。上次精電董事減持，每股作價高達8.20元，但一樣有芬佬接貨，現價相對博得過。
梁從源