港股忽然起動，隔晚美股先跌後升及油價再落，帶來刺激。上升窩輪通街係，當然係C輪，升幅超過25%嘅，有四十幾件咁多。恒指收13799，萬四點睇嚟冇乜走雞。
滙控C輪3976：恒指升141點，滙控（005）升1元，佔咗36點。滙控成交金額16.5億元，佔大市12%，成交量較前市大增3倍，有啲味道，開始有火氣，買滙控C輪，有銀搵。
遠期對象3976，收52仙，升得2仙，脫晒腳，過於落後。3976係最熱門嘅遠期滙豐C輪，成交金額41球，明年1月初夠鐘，溢價3.4%，槓桿率24倍（有效13倍），引伸波幅11.9%。次熱嘅4766，都升6仙，收69仙，3976只係爬升得2仙咁大把，睇住嚟，好快跟番上去。
滙控C輪4441：滙控C輪升得最勁嘅係4445，收13.2仙，彈上38%。隻輪6月1日到期，最後交易日係5月26日，日子唔算長，溢價1.9%，槓桿率94.7倍（有效36.3倍），引伸波幅11.1%。咁嘅槓桿率，當然爆炸力好厲害，殺傷力自然亦係。
炒4445有啲搏命味道。嫌3976移動速度緩慢，想搏殺而唔係搏命，揀4441，6月尾夠鐘，輪價25.5仙，溢價1.1%，槓桿率49倍（有效27.7倍），引伸波幅9.6%。玩慣滙控C輪嘅人，冇邊個唔知4441，成交金額最多嘅滙控C輪，經常就係佢。
中企C輪3716：恒指勁升，國指只應酬式升得13點，估計會跟番上去，買中企指數C輪3716，6月尾到期，輪價9.8仙，溢價2.9%，槓桿率24.8倍（有效12.8倍），引伸波幅22.9%。3755數據靚，但交投比唔上3716。
章盛