北京上海廣州深圳發生學生示威反日，學生向日本使館擲石頭，高喊抵制日貨，杯葛日本口號。
中國學生都算有歷史傳統，自五四運動開始，嗌抵制日本、杯葛日貨凡八十餘年，嗌足四代，卒之都係愈嚟愈倚賴日本貨。旺角啲數碼影音店如果冇日本貨賣畀啲內地自由行遊客，邊度重有碇企呀？同日本糾紛過百年，點解冇一次係日本大學生高叫杯葛華貨嘅呢？思之令人黯然。
講經濟學理論，自然冇抵制、杯葛呢回事。國際貿易係你情我願嘅，一百年前有炮艦外交，迫你打開市場，到咗二十一世紀，冇人揸支槍指住要你買日本貨，譬如中國汽車市場龐大，日本汽車逐漸佔領大部份市場，美國三大廠加德國福士已經打輸場仗，中國汽車市場佔有率逐漸俾日本車佔咗去。喂，上海人、廣東人，點解唔買桑坦拿而改買豐田、本田呀？
日本人認為中國學生反日，只係一時之快，亦不排除係四月清明時段，轉移視線，等啲大學生掛住反日，唔去搞紀念胡耀邦、趙紫陽，如果唔係，做乜北京所有媒體集體封口，對學生上街反日如此大新聞，隻字不提，反而東京各報紙就以此為頭版頭條？好明顯就係中央隻眼開隻眼閉，畀學生上街之餘，又有充份保留啦，香港啲傳媒跟得咁快，做得咁大，因住變成係非愛國派呀！
四月十日，日本最大證券商野村無視中國學生反日，宣布會喺北京設立中國註冊嘅野村控股公司，全面發展中國投資業務，此乃大動作，表示野村係嚟真嘅，成事之後，勢必聘用上千名北京上海學生？唔知野村會唔會專係請一啲曾經參加反日示威嘅學生呢？