買樓之後，通常都會買埋家居保險，不過，好多人都無留意，簽訂買賣合約之後，即使未收樓，物業有問題，新買家都要負責，喺成交期內，會出現保障真空期。其間萬一間屋有火燭或者打風等意外，都唔會有得賠。
為咗令買家可以置業安居，美記噚日宣布，聯同屬下美聯資產管理，以及美亞保險，送成交期內樓宇保險畀住宅買家。美記副主席張錦成話，佔咗九成半買家，都會喺九十日內完成交易，所以今次就送九十日保費。
美亞保險營業代理部副總裁簡志坤話，保費會因應單位呎數計算，以七百呎為例，一年保費一千一百，投保兩年，只須千七。佢重話，自從香港仔添喜大廈事件，業主要承擔巨額賠償後，業主責任保險都好重要，所以會送埋畀買家。
將軍澳蔚藍灣畔快將入伙，噚日率先開放會所，畀傳媒參觀，戶外園林泳池，布局別具特色，而室內嘅水晶吊燈，就份外耀目，夠晒氣派。聽講，成個會所嘅水晶燈，價值五百萬。住戶好快就可以享用嘞。
信和集團韓家輝話，公司未來嘅住宅發展，會所都會以蔚藍做標準，只會提升質素，但絕對唔可以降格。
另外，較早時離開永泰亞洲嘅劉貴玉，去向終於揭盅，就係過檔信和，出任營業部助理總經理。據伊人講，噚日只係第二日返工。
信和今年有幾個大盤要賣，手上嘅發展項目都唔少，唔怪得要招兵買馬，聽講，已經喺同行度搵咗幾個過檔幫手。發展商營業部，今年唔知係咪會出現音樂椅遊戲呢？
中記一姐劉瑛琳，最近獲母校丘佐榮中學邀請做嘉賓，同藝人方力申一齊向學生分享成功之道。商界同影藝界齊齊講授，相信學生會受落。一姐重以傑出校友身份頒紀念品畀方力申。
呢間學校嘅傑出校友，重有星展銀行馮孝忠，同專業界嘅譚香文議員。
另外，一姐負責嘅九龍住宅部，上個月營業額近七千萬，有二十四組條數過百萬，可見佢嗰一套管理方法行得通。每組都獲一姐頒錦旗以示鼓勵。
旺角彌敦道前金玉滿堂酒樓個位，早排三億八千五百萬賣咗，市傳買家係渣打，聞說貪佢交吉，好快可以自用。彌敦道唔少業主趁勢放盤，其中三個投資者，同期委託一太標售物業。
七○五號全幢，六層商住樓，六千呎，下周二截標，地舖至一樓交吉，樓上連約，估值八千萬。
七一七號地下A舖連外牆、一樓及平台、十三樓A、B連天台，五千二百五十呎，連二十七萬租約，下月二十號截標，估值七千五百萬。
另外，五八○G至K號地庫機舖，六千呎，連四十萬租約，下月十三號截標，估值八千萬。
電郵地址：[email protected]
