田少今日開記者會，預料佢到時都會表態屈服唔選特首。如果連田少都唔玩，分分鐘剩番中方欽點嘅煲呔、唔夠一百票嘅李永達、志在陪跑嘅葉國華同詹培忠，咁啱呢四個人嘅身材同鄧小平差唔多，特首選舉變咗四個小矮人大混戰。如果再湊多三個小矮人（好似陳祖澤、何俊仁同梁富華），加多埋卿姐，咁特首選舉分分鐘可以拍成《雪姑七友》。
不過八方相信到咗兩年後，候選人嘅平均身高有望大幅改善，田少同唐唐兩人蠢蠢欲動，吳光正同李國章都可能去馬，梁振英又可能按捺不住，馬丁分分鐘被迫上梁山，咁啱呢幾個人都係高佬，到時特首選舉就變咗六個高佬圍攻一個小矮人，嘩，好睇過圍攻光明頂呀！
傳真︰2623-9278
電郵︰[email protected]