個市大牛皮，恒指高低波幅得56點，埋單屬於打和。總成交縮到107億元，連續第4日減少。短期走勢，都係難破悶局，落場炒輪，細細注算數。
新地C輪4631：新地（016）收71元，升1格，對恒指上升嘅貢獻竟然已經排名第2位，帶動恒指1.9點。第1位係中海油（883），亦係升得1格，就已經成為恒指升幅最大貢獻者，拉動3.3點。新地等候向上爬，低位收集C輪，對象係4631，7月初到期，輪價34仙，溢價3.4%，槓桿率20.9倍（有效12.6倍），引伸波幅19.8%。4643數據都好靚，6月初夠鐘，輪價24仙，溢價只係2%，槓桿率29.6倍（有效18.5倍），引伸波幅16.5%，但近期熱炒嘅地位，已由4631取代，昨日成交金額得番250萬，只係4643嘅3成半。
華創C輪3816：華創（291）派完成績後，少少醒神，收11.05元，升0.20元，成為最大升幅恒指成份股。4隻C輪，得2201有成交，但金額亦只係36萬，收17.9仙，升幅5%。
華創C輪交投大半片空白，好難炒，如果買嚟揸，3816夠晒長命，唔怕輸溢價。隻輪06年12月中到期，輪價19仙，溢價7.7%，槓桿率5.8倍（有效4倍），引伸波幅25.2%，衰在好難買賣。
國壽P輪3706：國壽（2628）有咗派成績表日期，股價即刻少少走樣，收市前12分鐘，由5.15元掟落5.05元收市，全日埋單唔見0.15元，大槓桿率嘅C輪當災，有兩件大瀉46%。熱門貨3794，成交金額16.7球，散20%，收28.5仙，7月中夠鐘，溢價4.7%，槓桿率17.7倍（有效10.3倍），引伸波幅23.4%。國壽成績表估計唔靚，咪貪平博C輪。要做嘢，做「賊」嗰便，買3706。
章盛