世上十全十美嘅嘢實在難求，更何況係日對夜對的安樂窩？若然屋企患有先天不足的結構性問題，長此下去睇到都眼冤，真恨不得快快將之解決掉！與其日愁夜愁傷腦筋，倒不如參考以下實例，學吓點樣用鏡子拉闊視覺，兼且將唔應該喺當眼處出現的礙眼窗戶，用掩眼法變走。
記者：梁彩燕
攝影：楊錦文
全身鏡牆收埋天井窗
屋主Steven同太太都很有主見，由牆紙、飯廳儲物櫃以至電視櫃的設計，都畀咗唔少idea。始終屋企是自己的，所以兩人都好有要求，之前參考過唔少家居雜誌攞靈感，而大家都偏愛白色，喜歡簡單舒服的家居，坦言「舒服就得，但又唔想太單調，屋企裝修最好簡單得來又有啲嘢睇」！而為咗Match番成間屋的Style，Steven就建議將原裝的啡木門髹成白色，配合番成間屋的一身簡潔，同時亦Young好多。
但較棘手的難題是，客廳同飯廳面積偏長身，而飯廳又遇正有個天井位，凸出個窗框好礙眼，一直都想不通究竟如何解決天井窗的問題，咁啱屋主想裝塊鏡牆，最後靈機一觸，將鏡同窗合二為一，就演變成眼前的全身鏡牆，一來可以拉橫番視覺變得正方啲，二則鏡子化身成暗門掩人耳目，閒時鏡門同天井窗亦可打開透透氣，靈活運用。
玄關Details多
入屋前先見玄關位，短短的空間內卻見心思處處。大鏡子方便照靚靚先出門，旁邊放有薄身鞋櫃，一般鞋櫃14吋深，但走廊通道偏窄，𠵱家就改裝成10吋深，啲鞋就改為打橫擺放，除咗可以放到約30對鞋之外，至緊要係通道闊咗。而細心望就會發現鞋櫃旁裝上小木板做櫈仔，出街前坐定定着鞋綁帶，夠實用！
為咗成屋唔會只得白色、銀色咁Plain咁單調，對住飯廳的牆就貼有清新的坑紋牆紙，望落摸落都頗有質感，唔講唔知，牆紙原本係直條子的，𠵱家就專登向橫咁貼，Steven都覺得「打橫黐拉長咗空間亦順眼好多」。
不銹鋼門框夠潮
屋內最容易被客人留意到的廚房門（因為近大門）係非一般門框，銀框望落金屬味甚重，原來係用咗不銹鋼質料，估唔到不銹鋼已經唔係用來做砂煲罌罉咁簡單，搖身變成家居用材，出來效果唔會老土重新潮啲！而且易打理、唔變質、唔黐塵的特點幾為人接受㗎！
拒絕雜亂
眼見Steven屋企儲物櫃唔算多，原來想東西盡量不外露都有辦法。衣櫃、書櫃度身訂做兼入晒牆已經極度慳位，細節位如凹陷式的櫃門手柄、趟門設計甚至床底都可成儲物格，冇雜物，家居自然更舒適。
醒目小貼士：直紋牆紙橫向貼
貼牆紙可以美化家居，鍾情條紋Pattern可要注意！一般貼牆紙都打直貼，可有想過將貼法轉一轉，就可為空間帶來另一新景象？尤其是遇正直條子，若依舊以打直方式貼上，效果會顯得怪怪兼視覺會向上移，一大幅反而會變得擠逼狹窄，轉為橫向貼，卻有增闊增長空間的效果，好似屋主Steven咁揀埋有坑紋款式，更可提升美感同質感。
地區：西九龍昇悅居
面積：655呎
間隔：2房2廳
裝修費：$150,000（設計、裝修及家具）
