周汶錡早前穿上泳衣，與吳嘉龍和其他新代言人在小島上拍攝廣告，她大爆吳嘉龍與另外一名外籍男模為搞氣氛，大力夾住她及搣她的肚皮。
周汶錡（Kathy）與吳嘉龍以Bella代言人身份，上月與六位新招幕的男、女主角拍攝新廣告。一行八人穿上泳裝，在西貢對開一個小島上的沙灘拍照。Kathy穿上大會準備的性感桃紅色泳衣，吳嘉龍則以緊身泳褲上陣，更露出大腿的巨型花朵紋身。
Kathy昨日接受電話訪問時，大談拍攝趣事，她說：「好耐冇試過同咁大班人一齊拍廣告，所以都幾得意、幾好玩。不過因為初時大家唔熟，攝影師話效果好生硬，咁吳嘉龍就搞吓氣氛，佢同另一個外籍男模夾計玩我，佢哋大力咁夾住我，吳嘉龍又用手搣我個肚，笑到我死，之後都拍得好好。」
拍攝當天Kathy一度擔心落雨影響進度，中途又暈船浪，她說：「個小島冇嘢食，冇廁所，全部都要返上船，所以拍嘅時候都有少少暈船浪，返到屋企瞓覺時都重浮浮吓。」
此外，Kathy、吳嘉龍、楊怡和吳卓羲昨日在時代廣場出席一帆船鞋品牌活動，其間下起大雨，圍觀者僅得三、四人，吳卓羲即幽默地說：「係天公造美，我哋試着嘅衫係防水，正好配合主題。」對於吳卓羲有份灌錄無綫主題曲大碟，楊怡笑說：「一定唔買，係都佢送畀我啦。」吳卓羲卻帶弦外之音說：「有林峯，佢都會買啦。」
採訪：DebbieLum、KellyCheck
