十大丟臉名人不乏俊男美女
曉格蘭特叫雞最

美國娛樂網站iVillage早前透過公眾投票搞咗個名為「最羞恥名人選舉」，結果十年前喺美國嫖妓嘅英國男星曉格蘭特（HughGrant）以大熱姿態成為冠軍，而多位曾經牽涉入性醜聞嘅名人都統統打入十大。

想再次合作
現年四十四歲嘅曉格蘭特，九五年喺洛杉磯同黑人妓女DivineBrown喺車廂內鬼混俾警方捉到正，成為全球娛樂頭條，雖然件事過咗十年，但大家仍然記憶猶新，網站嘅發言人話：「A級明星經常俾性醜聞影響，但係曉格蘭特呢單嫖妓案實在太唔應該發生。」但曾經同佢合作過《真的戀愛了》嘅姬拉麗莉（KeiraKnightley）話其實好鍾意曉格蘭特，重想同佢合作多次㖭！

朗尼排第四
第二位係姬蒂摩絲（KateMoss）前男友PeteDoherty，因為佢之前公然話自己係道友，令人嘩然；而因為春宮帶事件成為全球笑柄嘅ParisHilton就成為季軍。
至於早前被揭發召妓嘅英國國腳朗尼（WayneRooney），今次亦打入第四位，○一年尾喺美國著名百貨公司偷咗成萬蚊名牌嘅雲露娜維達（WinonaRyder）排七位，而經常因為藏毒同埋搞事而出入監獄嘅羅拔唐尼（RobertDowneyJr.）就名列第九，至於第十位就係九八年喺洛杉磯公廁發生「不道德行為」嘅著名男同志佐治米高（GeorgeMichael）。