曼聯嘅英格蘭前鋒朗尼最近認真唔掂，除咗涉嫌打愛華頓球迷（對方最後唔告佢），波又打得唔好；日前佢重搞單大嘢，俾英國傳媒踢爆佢喺間夜店度同女友高蓮嗌交，重郁手摑咗對方一巴。
單嘢發生喺星期日晚，朗尼同高蓮及其他朋友落柴郡一間高級娛樂場所消遣。由於曼聯啱啱食咗升班馬諾域治兩隻光蛋，朗尼好唔開心，諗住同高蓮呻吓；點知高蓮掛住應酬班朋友，冇理到佢，於是就借勢發脾氣。據知情人士講，初時佢哋淨係嗌交，但朗尼愈鬧愈㷫，最後重摑咗高蓮一巴㖭。
事後朗尼及高蓮透過發言人表示，承認有少少爭執，重話經已解決，但就唔認有嗌交同打交。
情侶嗌交係好平常，但朗尼郁手打人，點講都係唔啱；何況佢係公眾人物，更加要注意自己嘅言行，以為下一代樹立榜樣。喺嚟緊嘅星期日曼聯會同紐卡素爭入英足總盃決賽，朗尼應該化悲憤為力量，全力幫球隊捧走呢個盃，無謂搵女友嚟出氣呀！
禾恩有名即有利
噚日我求大俠為大家介紹過愛華頓超新星前鋒禾恩，周日聯賽勇破三項紀錄，有名之後果然有利，球會喺賽後亦決定加佢十鎊（約一百五十港元）周薪！其實佢𠵱家同球會簽嗰張仍然係學徒球員合約，原本𢭃緊八十鎊周薪，呢次加幅都超過一成，已經好過香港打工仔好多嘞。
加拿斯請安份做「閘」
周二英國傳媒報道話車路士後衞加拿斯，如果繼續被安排出任邊衞，無得踢中堅的話，季尾就會離隊。我求大俠覺得呢位法國國腳咪儍啦，𠵱家車路士中堅人材濟濟，想同隊長泰利、領隊摩連奴愛將卡華奴、或者上緊位嘅侯夫爭位踢？不如叠埋心水做好一個閘位球員重好啦。
古華特恨過檔跟舊帥
荷甲阿爾克馬爾候任教練雲高爾之前教阿積士抑或荷蘭國家隊，都非常照顧古華特，所以希望下屆同呢位紐卡素球員故劍重逢。古華特雖然得二十八歲，但早熟早殘，已冇乜市場；加上阿爾克馬爾有個有錢主席舒寧加撐腰，應該畀到好條件佢，所以如果成事，佢算係執到。
摩連奴遲早累死車仔
車路士領隊摩連奴，唔肯出席對拜仁嘅歐冠盃八強次回合嘅賽前官方記者會，𠵱家可能有手尾跟；摩連奴咁做，擺明係玩報復，唔滿意歐洲足協之前罰佢停賽，令佢唔可以八強賽親自督師。我求大俠認同摩連奴教波好掂，但弊在份人麻煩，而佢再咁落去，遲早累死車仔。