朱孝天早排俾台灣傳媒踢爆同日籍女友佐藤麻衣同居，但原來佢都幾花弗，近日有雜誌報道朱孝天舊年同內地演員李冰冰喺北京拍中央電視台劇集《天空之城》時，兩人戲假情真，李冰冰重喺朱孝天酒店房度宿一宵㖭。
舊年七月初，李冰冰以一身便服夜訪朱孝天，點知俾酒店保安拒絕入內，要朱孝天落樓接佢，佢哋兩個喺搭𨋢嗰陣重扮唔識㖭。
當到咗五樓後，朱孝天終於放低咗戒心，一手箍住李冰冰嘅膊頭，同李冰冰面貼面，重唔理重喺走廊，不停咁錫李冰冰，之後佢哋終於入咗朱孝天房，逗留到第二日先離開。
朱孝天噚日透過經理人支向理話：「照片是事實，但描述太誇張。」佢又話兩人拍戲嘅時間真係有啲感覺，但拍完戲就乜都完晒，而且異地分隔，所以都冇乜發展機會。反而麻衣睇完啲相反應好激動，不但大喊一場，佢重話今日要開記者會宣布同朱孝天一刀兩斷。
而李冰冰近排就喺香港同朱孝天嘅舊拍檔吳建豪拍緊新片《猛龍特警隊》。
李玟噚日接受港台訪問，李玟新碟有首歌叫《SoGood》，內容係講女人做啲乜嘢會令男人想入非非，李玟話：「為咗配合首歌，我拍咗個好sexy嘅MV，着咗一件肉色三點式泳衣跳舞，本來個導演要求我淨係黐乳貼，但我真係接受唔到。」
苗僑偉同吳美珩等一班無綫新劇《人間蒸發》嘅演員前晚喺尖沙嘴食飯，一齊欣賞苗僑偉嘅新劇《學警雄心》。苗僑偉近日拍咗多套電視劇，分別同米雪同吳美珩有感情戲，苗僑偉話：「真係愈拍愈後生，下次我重同楊楊囗囗合作做情侶㖭。」
許冠文前晚接受商台訪問，佢話紅館開嘅兩場棟篤笑所有門票已經售罄，問佢會唔會喺個騷度講吓反日遊行同釣魚台事件？佢話：「今次事件就可以睇到香港人幾咁冷靜同現實，釣魚台都係睇吓邊個手瓜夠大啫，大家心中有數㗎，行街（遊行）係冇用嘅，最緊要講實力。」咁就要睇吓佢喺棟篤笑上有幾多實力啦！
姚樂怡最近為擔任纖體代言人嘅「變靚啲」拍硬照廣告，當日佢穿上多套三點式同BraTop短褲上陣，大晒纖體後嘅身材。樂怡聲稱自己嘅腰圍同下圍都細咗，加上佢有36E上圍，所以對𠵱家嘅身形好滿意。雖則身材好咗，但樂怡就大歎冇人追，至於傳李彩華男友蕭定一追佢，佢話對方係纖體公司老闆，大家又識咗好多年，只係流料一則。
方中信前晚喺商台做訪問，重飲咗啲酒先嚟，問佢係咪驚要講佢自己嘅性經驗，所以飲酒壯膽？方中信顯得好愕然，佢話：「乜要講嘅咩？佢哋淨係叫我講吓覺得娛圈邊對係絕配情人咋，不過如果要咪講囉，冇乜所謂。」而佢就覺得梁朝偉同劉嘉玲最絕配，兩個都事業有成，同埋經過咁多風浪仍然喺埋一齊。
戚黛黛噚日到旺角為慧妍雅集義賣籌款，近日港姐進行招募，戚黛黛都有游說妹妹參加，不過由於妹妹怕醜，唔敢着泳衣，所以最後都游說失敗。而早前戚黛黛投資嘅精品店結業，雖然蝕成六位數字，但都無損佢創業嘅決心，𠵱家佢計劃開小食店，但就會搜集晒啲資料先落實開舖，唔會似上次咁準備不足搞到損手爛腳。
