聽完飛哥（岑逸飛）講糖尿，又碰到惡佬明講糖尿，佢經常上網睇種種奇難雜症，對醫學常識甚為豐富。佢話糖尿病極大多數來自遺傳，人體內有隱藏性糖尿基因，平時唔會發作，一碰上大病，身體虛弱之時，啲糖尿基因就會走晒出來，促成糖尿病。譬如一位婦人身強體壯，百病不侵，懷孕後可能消耗太多，醫生就驗出佢體內有隱藏性糖尿基因。老友大隻Ｋ體魄一流，一次食貝殼類海產，染上Ａ型肝炎，要入院治療。病咗一場，出院之時，竟然已經出現糖尿病，惟有嘆一句時運低。故此我哋冇事者唔好拚命吃甜品，否則一旦唔好彩，體力衰弱之時，隱藏性糖尿基因不再隱藏，走咗出嚟，就變成雪上加霜。
惡佬明對公立醫院亦十分熟悉，佢位親戚幾個月前去威爾斯親王醫院接人出院，付帳時，睇張單寫明醫療成本高達兩三萬元，實際付款幾百蚊。親戚好過意唔去，但人哋收你幾百，冇理由自動畀夠兩萬幾嘅啫，咪由納稅人付鈔囉，自己都有交稅㗎。惡佬明最近有個主意，佢認為各間公立醫院不妨在收銀部設立捐款箱，請自覺過意唔去之人捐錢，現金、支票皆歡迎。惡佬明講：「同一手術，我哋唔去公立醫院排隊，到私家醫院，分分鐘要畀十萬八萬，非一般中產階級所願意負擔，但如果公立醫院開出成本三萬，只收幾百，我哋捐番一千至三千，唔會覺得肉痛。一個捐三千，一百個就有三十萬，醫院用嚟請多幾個阿嬸清潔地方，都對病人有益吖！」
呢條橋唔知行唔行得通，威爾斯親王醫院服務新界東，病人特別多，怕且有人肯自願自動捐吓錢啩？瑪麗醫院位於豪宅區、中產區，捐款可能收得更多。各醫院各自收到捐款使用，服務一定會更好。