呢個世界真係「瘦田冇人耕，耕開有人爭」，呢頭大家都話怕怕做特首，嗰頭就一個二個話要選。八方話金融界會有人出嚟挑戰煲呔，噚日就馬上搵到真命天子──詹培忠（圖）。
金勞詹唔妥公務員出身嘅煲呔做特首已經唔係新聞，上次佢喺立法會就公開叫北京三思，又話咁等於沒有英國國旗嘅英國班底人回朝，衝擊好大。
噚日佢老哥喺由廣州返港嘅火車上，更斬釘截鐵話，如果冇人出嚟同煲呔選，佢一定去馬，除非攞唔到一百張提名票，或者有人阻佢。
金勞話，做人唔使客氣，「小圈子選舉我最叻，全香港只有我可以爆大大大冷門。」的確舊年立法會選舉，佢成功捲土重來，佢話，煲呔一知結果打電話畀佢，猛話「詹叔，佩服佩服。」
煲呔對老詹示好，但係對方唔領情，老詹話煲呔係叻仔，但係只可做第二把手，而特首就應該由好似佢呢種「愛國愛港」人士擔當先啱。
傳真︰2623-9278
電郵︰[email protected]