喺星期日嗰三場英超聯，最矚目嗰場原來係冇得直播嘅愛華頓主場以四比○擊敗水晶宮嘅賽事，事關為愛華頓入最尾一球嘅前鋒禾恩，今屆首次喺聯賽上陣就一口氣打破咗三個紀錄。
禾恩以十六歲二百七十一日之齡，成為歷來最年輕為愛華頓A隊上陣嘅球員，另外由於佢射入一球，更成為愛華頓歷來最年輕嘅入球球員，以及英超聯歷來最年輕嘅入球球員，打破咗米拿喺兩年前以十六歲三百五十七日為列斯取得入球時所創嘅紀錄。
由於禾恩係愛華頓嘅青訓產品，球迷好自然將佢同前愛華頓神童朗尼比較，愛華頓副領隊艾雲亦不諱言禾恩潛質高，而且射門觸覺極敏銳，重話佢只係同A隊操咗幾課，就已經有咁好嘅成績。睇嚟，愛華頓已經視禾恩為另一隻金蛋。不過，艾雲都好中肯咁叫球迷畀多啲時間禾恩，而且佢亦承認如果唔係愛華頓隊波太多傷將又太少後備兵，禾恩都唔會有機會。
日本專搵中國笨
日本足總早前提議將亞洲區分成東、西亞兩區，似乎對中國唔公平。一○年世盃決賽周亞洲區出線席位有五個，東亞三席，西亞兩席。表面上，東亞球隊出線機會高過西亞，實際上因澳洲入咗亞足聯且列東亞區，一向隨日、韓之後嘅國足，無端端多咗澳洲呢個對手，日本又可避開伊朗、沙地啲西亞強隊，出線機會大增，呢個提議係咪搵中國人笨？
拉素愈窮愈見鬼
拉素球迷認真唔生性，噚晚對利禾奴場波賽前重好虔誠咁為教宗默哀，轉頭一開波就展示法西斯標語又叫口號，好彩最後相安無事。賽後會長盧迪圖無奈咁話球迷嘅行為好難制止，因為球會冇可能派人逐個「嘜」到實。拉素呢幾年好鬼窮，正需球迷入場支持，點知部份極端球迷就偏搞事累球會愈罰愈「甘」，或者呢啲就叫做愈窮愈見鬼喇！
強隊戰意好難估
NBA常規賽𠵱家打到接近尾聲，榜首球隊啲戰鬥力同戰意真係好難預測，好似馬刺連續兩場加時就打到殘，連中鋒尼斯達洛域都傷埋，真係唔知佢哋咁博為乜，畢竟季後賽席位已經落袋，不如養精蓄銳備戰季後賽重化算；反而太陽同熱火呢啲強隊，就有放軟手腳迹象，故此若然賭波公司開強隊盤讓分太多，真係處處陷阱，上盤客真係要小心啲。