相信好多人都知PSP行貨嘅消息，香港玩家可算等了又等，終於會喺5月12日見街，今日SonyStyle更開始接受預訂。同美國一樣，主機只有ValuePack（齊料版），定價港幣1,980，跟現時水貨差不多，不過好多人對有保養嘅行貨有信心得多。系統介面相信出機時仍未支援中文，但證實日後透過軟件更新，就可睇埋繁體中文。至於較多人關心嘅問題如保養範圍會否包括LCD死點、UMD影碟區碼等仍有待公布。
SonyStyle預訂熱線：28931183
PSP遊戲炒得起
上星期推出嘅PSP美版《UNTOLDLEGEND》大賣，喺大缺貨底下出現炒風，今個星期依舊由$350炒到上$420都重有大把人搶，真係唔可以睇小PSP嘅炒賣潛力。而月尾推出嘅《首都高BATTLE》同《FIFA2005》相信都唔荒夠貨賣，有興趣真係要快手訂定先。
2大動漫Game威晒
截至上星期日為止，Game場最熱賣嘅首推BANDAI2隻動漫遊戲，分別為由NAMCO代為開發嘅《高達：一年戰爭》，同十年冇出過遊戲嘅《聖鬥士星矢》。前者無論畫面同操作性，均比BANDAI自家開發嘅第一隻強勁得多，加上新元素如機內視點等，雖然舊瓶新酒都非常吸引。至於《聖鬥士星矢》，遊戲初回版送「聖衣神話」嘅聖衣箱，同「聖衣神話」教皇薛安嘅認購券，搞到好多冇玩開機嘅Fans都要買番隻儲吓，過咗咁多年，都重引到唔少擁躉捧場。𠵱家兩隻Game市價都係$468，企得幾硬吓。
相反同期推出嘅《宇宙戰艦大和號》同《後園摔角2》就無乜人問津，反而前排《WE8LE》同《NANA》依然都有長賣長有。前者市價$450，後者則賣$350左右。
文：打機鐵人
