好多人都唔想煲呔自動當選，但係𠵱家睇怕提名期一結束，唔使到等到七月十日，煲呔都已經自動當選，可以坐喺度印印腳到七一，等胡溫曾嚟香港同佢宣誓。
見到咁嘅情況，行會成員陳智思（圖）就叫啲人、特別係傳媒，「唔好過份吹捧煲呔」，搞到其他人唔肯選！陳智思近排就接受學協嘅《大學生報》訪問，條標題就叫「政治難撈」。陳智思話，佢個人嘅去留視乎新特首點諗，但就算新特首再搵佢，佢都要諗諗係咪理念一致，同新特首嘅期望，「如果大家嘅expectation唔同，唔單止累佢，重會累埋自己！」
陳智思一直都唔屬煲呔陣營，都有人估佢做到七月就會俾煲呔叮走。陳智思事先張揚咁多顧慮，唔知係咪以退為進呢？
傳真︰2623-9278
電郵︰[email protected]