「龜公，正龜公，」清晨六時，一位伯伯在大澳的街市上，手上拿着一隻大草龜正在兜售，「一早有人嚟賣，六十蚊一隻，我揀咗隻大嘅龜公，𠵱家人哋收咗檔，我賣番出嚟90蚊，賺30蚊。」這位伯伯老實得可愛。
大澳的茶樓坐滿飲早茶的街坊，沙煲咁大個的糯米雞、大大粒的豬肉燒賣、比巨無霸更巨型的傳統大包，還有真正原盅蒸的盅仔飯，一粒粒的絲苗白飯乾爽煙韌，淋上甜豉油，一盅飯加一壺濃茶，早餐當晚飯吃。
市集內還有大量零食供選擇，「要一塊煨魷魚唔該。」「等唔等得呀？我唔得閒喎。」煨魷魚的檔主伯伯說，只見他拿着一把大鉸剪，剪法如神，充滿功架，一小刀一小刀地把魷魚的尖角剪去，比甚麼頂級salon的stylist更有法度。除了煨魷魚，更應試試在市區吃不到的煨瀨尿蝦乾，味道非常鮮鹹、非常瀨尿，十元有十二隻，抵食過去甚麼良品買加工產品。
四元一塊麥芽糖夾克力架餅，懷舊之至，可要求加上芝麻，又甜又香口，有排食。口渴別喝汽水，請飲紫背天葵，街坊稱之為大澳利賓納，重有益健康㖭。山水豆腐花、茶果、缽仔糕、馬拉糕、雞蛋仔全部用人手以傳統方法製成，吃風味也吃味道。早上十一時左右出爐菠蘿包及老婆餅，熱辣辣香噴噴，遠遠便聞到。
大吃大喝之後還可買手信，乾貨海味、鹹蝦、蝦膏磚、生曬鹹魚及一樽樽的鹹魚醬。
下次到大澳乾脆早點來，由飲早茶開始，一直吃到天黑，吃之餘，也領略一下大澳從早到晚的美麗。