大市成交咁細，擺明就係投資者冇方向，難怪近排略為多番消息嘅濠賭股，再被投資者追捧，其中奧瑪仕（959）雖然唔係點升，但成交額高達6.4億元，係噚日最大成交股份，就知班炒家可能真係冇太多選擇。
經紀黃話，濠賭股好多都係唔係乾炒牛河，好似新濠國際（200）咁，不時有外資證券行出報告推介，好似最近先至有間美資行搵咗新濠去路演，難怪噚日股價又升6％，收22.75元，再創歷史新高，成交股數549萬股，金額1.22億元。
唔知係咪因為新濠股價太靚仔，江湖傳聞有證券行想搵生意，問新濠想唔想批股集資。
若果大家唔喜歡湊熱鬧，可以留意經紀黃推介嘅中怡精細化工（2341），隻股將於本周三公布全年業績，據聞飲得杯落，加上隻股貨源甚疏，由少數芬佬坐住，借好消息炒上，一啲都唔難。
中怡噚日升3.23％，收1.28元，但成交金額只得5.27萬大元，重係乾炒牛河。
慕容小初