太古地產上個月透過強制拍賣，統一西半山衛城坊四至六A號業權，合併隔籬西摩道舊樓起豪宅，日後肯定遮咗後面雍景臺景觀，屋之島歐志康話，雍景臺買賣不但冇受影響，造價重升緊。
喺太古強制拍賣前一個月，雍景臺有六單成交，拍賣後一個月，仍然有六宗。好似二座九樓D，千三呎，上月底以九百一十萬易手，每呎七千二，而三月初二座二十五樓D，成交價為八百八十萬，呎價只係六千九。
歐志康話，西半山一帶，尺碼千三呎左右嘅優質供應唔多，太古重建計劃，反為可以推動嗰區成交，估計第二季，西半山樓價可以上升半成至一成。
著名室內設計師兼華僑日報創辦人岑才生個仔岑啟基，委託卓先標售石澳山仔十九號B、C孖屋。兩屋去年三月及八月，以一千零五十萬以及一千四百萬買入，先後花咗幾百萬裝修，住咗唔夠一年就賣，岑公子果然有鋪搬屋癮。
聽講，呢兩間屋並未打通，不過內櫳裝修一模一樣，兩屋外牆都改成玻璃，吸引唔少路人駐足。
卓先林少明話，呢對咁獨特嘅孖屋，業主意向價超過五千萬，兩屋共三千七百呎，連近八百呎花園，五月二十號截標。
若能以五千萬成功賣出，呎價去到一萬三千五百五十，足足升值一倍。
樓市旺，市場對置業資訊需求大增，世紀21斥資百萬，與三昇傳媒聯手，出版《專家置業消費選擇》雜誌，提供包括法律常識、按揭、室內設計、家具、裝修用料、清潔、搬運及外傭服務等資訊。
三昇傳媒行政總裁魏德榮話，雜誌暫時只以季刊形式出版，預計下半年轉為雙月刊。凡透過世紀21買賣或租樓嘅業主同準業主，都可以免費獲贈一本。
世紀21行政總裁吳啟民話，希望透過呢本雜誌，推廣公司品牌。
長實集團喺馬鞍山及天水圍兩間酒店，近排齊齊推出月租優惠，招徠顧客。不過，優惠有別，針對唔同客源。
其中馬鞍山海澄軒，以商務住宿作賣點，特別將酒店其中兩層，闢作商務樓層，凡租住半年或以上嘅租客，可以享受六五折特惠租金、會籍、穿梭巴士套票等等，專門吸納商務旅客。
相反，天水圍嘉湖海逸酒店，就聯同近期宣布連串擴建計劃、宣傳攻勢一浪接一浪嘅海洋公園合作，今日齊齊召開記者招待會，公布酒店優惠詳情，實行趁迪士尼開業之前搶客。
一名上海投資者，首度嚟港，即斥二千幾萬，購入兩個舖位收租，出手夠晒豪爽。
金豐易居劉志傑話，買家喺內地持有唔少投資物業，又鍾意逛房產展，經多次傾談，終於決定來港考察，見尖沙嘴及深水埗區人流旺，兩日就扑槌，以一千零七十萬，購入尖沙嘴金巴利道六十五至六十七B地下三號舖，六百呎，租客為名牌時裝店，租約○七年屆滿，回報六厘。深水埗欽州街九十六號地下五百五十呎舖，成交價一千一百五十萬，由海天堂涼茶店承租至明年底，回報四厘六。
兩舖原業主係同一資深投資者，持貨十日賺二百萬。
電郵地址：[email protected]
