香港建築師學會真醒目，一早請咗煲呔做2004年年獎嘅主禮嘉賓，咁煲呔𠵱家頭戴兩頂帽，當然有好多記者蜂擁而至，會長林雲峰教授乘機講吓做領袖點先可以搞好個城市，重送咗個煲呔畀佢做紀念品。
講開煲呔，大家以為佢太太做咗署理特首夫人，應該多好多活動要參加，原來曾太忙裏偷閒自製果醬，最近重將啲製成品送畀教會中嘅朋友品嘗，一於分甘同味，聽講啲味道都好唔錯。
其實今年大年初一，八方同成班行家去曾蔭權官邸拜年時，當時曾生曾太一齊帶記者遊花園，已經見園中種咗唔少桔樹，曾太重話識得用桔仔做鹹金桔同果醬。
曾太娘家係澳門出名做餅世家，而曾太本身都鍾意整吓嘢食，送果醬畀教會朋友，都好應該，重記得煲呔曾初兼任署理特首嘅時候，記者日夜追訪，連佢去教會都唔放過，搞到煲呔最後話，「再係咁，教會就會掟我走。」今次可能叫曾太乘機𠱁番啲教友。
傳真︰2623-9278
電郵︰[email protected]