由周星馳自編自導自演嘅電影《功夫》，上周啱啱喺美國嘅洛杉磯同紐約七間戲院開畫，雖然周末三日票房只係收二十九萬三千美元（約二百二十八萬五千港元），喺美國電影票房榜排名十九位，但係計番佢每院平均收入，就高達四萬一千八百五十七美元（約三十二萬六千五百港元），係啱啱嗰個周末全美每院平均收入最高嘅電影。
《功夫》得出呢個成績，亦超越咗同樣係新力發行嘅《十面埋伏》，上年《十》片首周喺十五間戲院開畫，平均每院收二萬六千五百美元（約二十萬六千港元），而《臥虎藏龍》○○年喺十六間戲院首周開畫，每院平均收四萬一千四百五十美元（約三十二萬三千港元），亦唔夠《功夫》強勁。故新力已經安排二十二號會喺全美超過二千間戲院放映《功夫》。
至於上周票房冠軍，就係馬修麥康納希（MatthewMcConaughey）同女友彭妮露古絲（PenelopeCruz）合演嘅《Sahara》，票房收入為一千八百五十萬美元（約一億四千四百萬港元），而馬修同彭妮露噚日重一齊喺羅馬會見記者，宣傳新片。
鄭嘉穎同陳敏芝噚日為新劇《飛短留長父子兵》喺中環雪廠街名店Prada門外拍外景，吸引不少途人圍觀，Prada職員投訴當時有二十多名工作人員企喺店外影響櫥窗視線，不過外景隊就話事前已向警方申請拍外景，但職員不滿最後報警。警員到場了解，發現外景隊的確已申請認可證，並不違法，而且拍攝工作亦不影響公眾，故只勸喻外景隊後就離去。
韓劇《大長今》播完之後，無綫緊接會播出有日版《金枝慾孽》之稱嘅日本宮廷劇《大奧》，胡杏兒早排就去咗京都拍攝宣傳片《京都密語》，其間佢重着住和服，入鄉隨俗扮日本妹，又粉墨登場扮日本傳統藝伎，而佢亦都着咗一套重達二十幾磅嘅日本貴族嘅公主服，單係着呢套衫都花咗成兩個幾鐘。由於今次行程緊密，所以逗留六日都冇乜機會購物。
吳浩康噚日喺西貢拍攝無綫劇集《奇幻潮》，佢話戲中做大學新生，所以俾人玩，重畫咗個大花面，有場講佢瞓咗喺地下，點知有人用粉筆喺地上畫咗一個人形公仔嚇到佢即刻彈起身。佢話：「玩還玩，呢啲可免則免，大吉利是！」
剛被《時代》雜誌選為「時代百人」嘅章子怡，同日本殿堂級導演鈴木清順及男星小田切讓合作嘅日本古裝歌舞片《狸御殿》，下個月嘅二十八號正式喺日本上映，電影宣傳海報最近亦開始曝光。
海報中除咗可以見到男女主角之外，重用電腦特技，令已故日本歌姬美空雲雀「復活」。
何韻詩噚日接受商台訪問，主持人要求阿詩評論一下「叱咤榜」入面各歌手嘅表現，阿詩非常慎言，佢話：「其實真係好難講，個個都係朋友。」不過最後阿詩就批評吳卓羲唱現場時仍須努力，佢話：「其實佢係一個演員，唱歌都算OK，但佢唱Live既時候，可能太緊張而失準。」
