第一身軍事Game都好耐冇乜邊隻撐得吓場！前排玩過一輪飛機大炮，但對機迷嚟講只係槍Game「遊樂場」；久休6年名牌大作《SWAT4》將在PC登場，搵嚟真正SWAT成員做遊戲顧問，加現實SWAT最新槍械武備，每場突入戰都考量玩家反應及策略。筆者搶先試玩測試版，超細緻的場景加即時光影變化，是PCGame罕有能達的流暢境界！相信沉寂咗好一排嘅網吧、晚晚打天光嘅「死士」又要蒲頭喇！
記者：朱崇德
第一身軍事，一直以《R6》、《CS》及《SWAT》等元祖級強Game三分天下，前兩者打法一言以蔽之，就係「殺」！《SWAT》就較為另類，以即時「指令」多及TeamWork強聞名；今集《SWAT4》明顯將指令簡單化，令新手更易入手！電腦AI的增強，亦令突入戰的場面控制出現更多變數，是歷來最考玩家策略的一集！新加多種玩法的「網上對戰」模式，更係打到癲兼超爆笑嚟形容！
敵人位置次次唔同
OnlineGame月費搵真銀，令到好少電腦遊戲肯用心做單機模式，但《SWAT4》係當中嘅少數；玩家在遊戲中會扮演一個SWAT五人小部隊，同一般槍Game唔同處，係要你使用最少武力將匪幫繩之於法，當中還有機會夾雜人質，任你槍法如何準確，胡亂濫殺可能反招失敗收場！
遊戲的一大變數是「即時指令」，Mouse右Click輕按，就可以對手下的紅隊、藍隊下達爆門突入的指令！不過遊戲可是經過SWAT部隊超過25年經驗的隊員KenThatcher微調，事前的情報收集及突入時間的掌握，同現實一樣是出奇制勝的要點；電腦AI超強亦是難玩原因，匪幫每次Random布防，以至反擊、投降都是隨機出現，開槍與否每次都是生死抉擇！大家唔好以為完成所有指定任務就過關，遊戲真實處是使用扣分制，殺人質、隊員受傷、匪徒冇扣索帶都會造成扣分，Normal要求是50分，難度是一般，但要如真SWAT要求的95分，一個失誤已經GameOver，遊戲制度及分級制，都大大增強真實感及耐玩性。
光源變化靚到嚇親
今集《SWAT4》的畫面可以用恐怖形容。一磚一瓦都做到微細質感，背光時的影子移動，以至放煙霧彈的瀰漫感覺，都非常逼真！不過最正是遊戲的光源變化會隨角色移動而轉變，當中最有代表者是放置槍頭的Surefire，感覺有如打真WarGame一樣！場景設計亦是一絕，場地四通八達，你在這邊廂準備開門，敵人可能在背後開門！緊接就是一場混戰，極能營造遊戲張力！不過筆者更愛的，是遊戲將《沉默的羔羊》及《七宗罪》等經典電影納入舞台中，打落份外有親切感。
靚聲效亦是槍Game必備，整體槍械配音都好正，打牆、射窗、射人都有不同聲效，而且亦見真實感！不過最過癮係匪徒及人質都好多嘴，人質求你救佢出去，匪徒扮人質叫你唔好捉佢、鎖佢又話要搵律師，做得非常仔細兼搞笑！
受制索帶慘過酷刑
對於喜歡殺戮戰場人士，今集不能錯過的將會是網上多人模式；上集《SWAT3》只限5人網上連線，《SWAT4》就大步放寬為最高16人齊齊玩！基本現時最流行的「合作」過關模式，以及鬥到你生我死嘅「DeathMatch」都有得玩，較創新的有「RapidDeploymentMode」，玩法是遊戲場景內有三個炸彈，攻方就想盡方法去拆，守方就要陰陰濕濕唔畀佢拆之餘，最好背後插多刀，都幾有戰略性！另外「VIPRescue」都是新增模式，玩法是保護重要人物，守方要這名VIP送去指定安全點，攻方就沿途擄劫，係好傳統WarGame打法，不過槍Game上就較少有得玩！
另外一提大家！索帶手銬在網上對戰中一樣有效，俾人捉到套上一個，絕對係生不如死！以往香港OnlineGame場已經好興玩「騎屍」，今集玩埋索帶，即係活生生任你魚肉！其他折騰人的武器還有胡椒噴霧及電槍等，真係慘過滿清十大酷刑！
遊戲類型：ACT
對應平台：Windows
遊玩人數：1人（支援16人網上對戰）
行貨售價：$290（今日發售）
開發商：Sierra/IrrationalGames
(C)2005SierraEntertainment,Inc.Allrightsreserved.