TVB明益契仔　Eason、伊健靠邊站
克勤七星拱照做大班

無綫及環球昨日宣布攜手推出唱片《男人魅》，李克勤、陳奕迅、鄭伊健、林峯、陳豪等八位猛男一同出席宣傳活動，但只有克勤獲安排坐在中間的大班椅，凸顯其無綫契仔身份，陳奕迅及鄭伊健二人只能靠着克勤椅邊站着。

由電視廣播有限公司成立的正視音樂有限公司與環球唱片有限公司合作，於本月二十日推出以全男班演繹的無綫劇集主題曲及插曲唱片《男人魅》，有份參與的歌星及藝員包括李克勤、陳奕迅、鄭伊健、吳卓羲、鄭嘉穎、林峯、林文龍、陳豪、林保怡及鄧健泓，大會昨日於中環國金軒舉行記者會公布詳情。

「佢係重用嘅人」
除林保怡及鄧健泓未能出席昨日記者會外，大會安排其餘八位歌手及藝員以唱片海報相同的造型及排位出席記者會，唯一有大班椅坐的李克勤被安排在中間位置，彰顯他的無綫契仔身份，而陳奕迅及伊健只能挨着克勤椅邊站。但當無綫及環球高層加入大合照時，克勤就識趣地將大班椅讓予無綫高層樂易玲，在一輪你推我讓之下，工作人員將大班椅拉開才能拍大合照。
樂易玲被問到是否刻意安排克勤坐於至中位置，她說：「咁佢靚仔嘛！克勤係我哋TVB重用嘅人，又唱得、又睇得、又主持得，而且《殘酷一叮》又咁收得。」

「年紀大企唔到」
但克勤就否認被安排坐於至中位置是突出地位，他說：「係唔係靚仔真係一個謎，我諗係抽籤，或者睇邊個皺紋多，可能見我年紀大企唔到咁耐。」
至於被安排靠邊站的陳奕迅就說：「其實坐櫈係辛苦過企，佢着條咁窄嘅牛仔褲，重要擘腿坐。」問下體曾受傷的陳奕迅可是怕傷及舊患而不能擘腿坐，他說：「我重有咁多皮，可以拉得開嘅。」
採訪：卓美娟　攝影：陳偉權