飲食人誌：<br>摩登燒臘滋味飯OL力撐1粒鐘賣60碗飲食人誌：
摩登燒臘滋味飯OL力撐1粒鐘賣60碗
是日介紹燒臘飯，預你即時一句「有無搞錯呀？」不過咪柴台住，這間隱藏在中環結志街街市內的燒臘飯店，舖頭格局較傳統地踎燒臘檔摩登乾淨，破格的燒味小食及粉麵亦出位，其主打的「燒臘滋味飯」比一般燒臘飯有「營」，1小時午市大賣60碗，平均每分鐘賣出1碗，能成為中環新一代OL力撐之店，不無原因！
記者：黃婉冰
攝影：陳盛臣
熱爆滋味飯
拍攝當日，記者即使1:30pm到達，但一煲滿滿的滋味飯亦已售罄，只剩下一碗負責人預先準備好的供拍照，可見其「味」力果然不凡，也難怪，滋味飯紅紅黃黃，賣相確較一般白飯吸引及有營，而且單拼、雙拼、配白飯都一樣$25，所以能吸引一眾OL。
高纖有型啱OL
比起一般地踎燒臘檔，「先滋先覺」格局四正得多，門口燒味架乾淨明亮，裝修簡單但整潔。一到午市，每枱都坐滿在附近上班的OL、白領。之所以能吸引上班族，其自製獨賣的「滋味飯」絕對是撒手鐧，用白米、紅米、粟米煮成的「滋味飯」，比一般白飯多一份飯香及軟綿，兼且高纖有營養，正好切合一眾怕肥又鍾意食燒味飯的OL，每日午市，60碗「滋味飯」就在短短1小時內售罄，知碇熟客會先打電話預訂。
■師傅每朝七時熬製例湯，熬至午市足5小時，全無味精添加，碗碗足料夠味。
醬汁味道較淡
看餐牌，還有其他燒臘舖吃不到的特色燒味粉麵及小食，老闆Anna尤其花心思在醬汁調校上：「傳統燒味醬汁比較濃同鹹，一來會畀人一種肥膩唔健康嘅感覺，二來用太濃太鹹嘅醬汁醃肉，會令肉質變韌，所以我取中間位，清淡為主，每款汁都少鹽少豉油，有鹹味又唔會太濃，做出嚟嘅燒味更健康，更啱OL、遊客口味。」
午市爆棚
■無吹水，午市時段店內例必座無虛席。
午市MustEat
芝麻雞撈福建麵$25
賣相與油麵相似，但麵質較油麵爽及煙韌，配芽菜、新鮮白切雞絲及混了花生醬的麻醬，香濃惹味。
菜甫滷水鴨$38（例牌）
溏心滷蛋每隻$4
取紅滷水汁的色澤及白滷水汁的清香，由自家調配而成的滷水汁，色澤較淺味道較淡，以之滷鴨可令鴨肉保持鮮嫩；滷蛋可做到溏心蛋黃兼流油，是另一必試小食。
下午茶BestChoice
叉燒扒包$19（連餐茶）
燒味版豬扒包，漢堡包夾大大塊半肥瘦蜜汁叉燒、番茄、青瓜，鍾意濃味的話，可落埋跟包上的海鮮醬，叉燒扒夠厚勁飽肚。
8吋蜜汁燒排骨配雜菜沙律$20（連餐茶）
選用最靚的半肥瘦腩排，加自製蜜汁醃過再燒製，條條足有8吋長，成支拎住食夠豪爽，配青瓜粟米沙律，可調和燒排骨的油膩感，歎杯意式咖啡，呢個TeaSet夠晒豐富。
叉燒撈鴛鴦米$22（連餐茶）
鴛鴦米即米粉加粉絲，加叉燒、芽菜、自製海鮮醬撈勻食，咬落比想像中爽口。
滋味米紙卷$22（連餐茶）
以米紙卷包着用海鮮醬撈過的烤肉絲、青瓜絲、粟米，皮薄餡料配搭惹味又清新，不太油膩，可另選鴨絲做餡料。
格局唔地踎
■精美告示板擺門口，大大個字，經過實見到。
■裝修雖非美輪美奐，但木枱木櫈木卡位，總比又殘又舊的摺枱摺櫈舒服闊落。
■牆身沒貼滿劣絕字迹的手寫海報餐牌，改掛立體「以誠為本」掛畫。
上班族點睇
Crystal：「滋味飯有營養，燒味無咁油膩，例湯無味精感覺較健康，我最鍾意食溏心滷蛋。」
Vanessa：「燒味味道無咁濃同肥膩，味道校得幾好，叉燒肥瘦適中，好腍，個滋味飯好特別。」
Eric：「滷水鴨做得唔錯，肉質嫩滑，味道比潮州滷鴨清啲，就算淋喺飯面嘅汁都唔覺肥膩。」
先滋先覺（28518852）
地址：中環結志街10號地下
營業時間：8:00am至8:00pm
座位：48個
■下午一時後會出現人龍等食，平均等兩三分鐘就有得食。