作多棲發展嘅美國青春女星希拉莉杜芙（HilaryDuff），近年除咗拍攝咗多部電影之外，亦好積極咁發展佢嘅歌唱事業，被譽為新一代最有前途嘅女星，就連另一位人氣少女新星蓮莎露夏恩（LindsayLohan）亦視佢為頭號勁敵，據知佢哋重好唔妥對方㖭。
十七歲嘅希拉莉前日去到南美洲國家委內瑞拉，喺首都加拉加斯開騷，被指形象效法加拿大rock女AvrilLavigne嘅希拉莉，當日着住件性感小背心，喺台上又唱又跳，佢頻頻舉起隻手唱歌嘅姿勢，真係似十足AvrilLavigne，台下樂迷睇得鬼咁興奮。其實希拉莉今次係去當地出席一個名為「ConciertoM」嘅演唱會，而除咗佢之外，佢家姐Haylie同西班牙組合LaOrejadeVanGogh，以及墨西哥組合Mana都會參與演出，可謂陣容鼎盛。
另外，由童星出身嘅希拉莉早排接受傳媒訪問時表示，佢話自己變成一個唔正常成年人嘅機會唔高，佢話：「我覺得自己好幸運，我生活得好快樂，因為我正做緊自己鍾意嘅事。相反，我見過行內有好多年輕演員，都係俾父母強迫而入行，佢哋又要成為家庭嘅經濟支柱，所以佢哋唔似一般細路咁有紀律。」