八號仔電訊盈科舊年表現算幾好，賺咗十六億四，除咗核心業務電訊服務喺競爭劇烈嘅市場環境下可穩守外，又搵到策略性股東中國網通集團高價入股兩成，重有息派。不過啲投資者似乎唔多收到，啲股價重係咁弱，由公布引入網通做策略性股東嗰陣約五蚊，跌到去四蚊邊至反彈。
不過，你有你哋講，佢有佢哋做。電盈公布完業績後，副主席蘇澤光已經出咗海外做路演，同投資者講解一吓未來公司會有乜發展，雖然同網通合作拓展國內嘅多項計劃仍處於初步階段，但佢哋喺英國投資嘅無線寬頻服務就已經做咗差唔多成年，所以今個星期電盈就特別安排班記者去倫敦考察。聽聞蘇澤光去完美國路演後會飛去倫敦，同大家喺外地見面，請記者喺嗰邊食番餐地道嘅英國菜。
傳真︰2623-9278
電郵︰[email protected]