中國反日大示威，不但搞到攻擊大使館，拆日資百貨公司招牌，重毆打日本人，大陸公安笑騎騎咁睇嘢，幕後搞手嘅中國，乘機向日本仔扮晒嘢，竟然聲稱「責任不在中方」，而深圳市常務副市長許宗衡，重話中國人有「遊行示威」嘅「自由」，哈哈哈，真係笑死人！
深圳河以南嘅香港人，當然係睇戲咁睇！罷買日貨？毆打日本人，真係好笑，正如共黨話頭：香港唔係一個政治城市，只係一個經濟城市，香港人幾十年來，用慣日本貨，亦愛用日本貨，日本貨冇假冒，日本貨唔係毒粉絲，亦唔係衞生巾棉胎，用日本貨，唔會買到假嘢，亦唔會毒死人，日本人做生意，講誠信，講質地。
除咗日本商人，香港人亦萬分感謝某啲日本貨代理商，例如，身為中國人嘅蒙民偉博士，佢幾十年來，代理日本電飯煲，香港人由用火水爐煲飯，改用樂聲牌、聲寶牌，生活水準提高，蒙民偉發咗達，日本㗎仔又賺錢，團結和諧，三贏並進！
因此，喺日中關係出現某啲誤解嘅時刻，我哋六百萬香港人，更加要做到中國主席胡錦濤期望，合力搞好經濟，用行動來表示香港人有理性、有品味、有原則。
罷買日貨？簡直無可能！大量日貨，喺大陸製造，由日本技術顧問及行政經理親自監督領導，日薪人民幣十元為中國賤價勞工及盲流製造大量職位！抵制日貨，即是製造大陸失業人口，擾亂大陸商品經濟，日本仔將生產線轉移印度，大陸啲廉價勞工就冇工開，變咗四圍流竄搶掠，跟住就揭竿起義，跟住手就顛覆共黨胡溫政權！
大陸啲示威分子，當然都唔係盲嘅！佢哋亦係周身日本名牌，嗌口號青筋暴現，又唔見佢哋紛紛將屋企啲日本Hi-Fi，好似先嗰排天水圍狂徒咁，通通掟晒落街？無他，喺大陸，上吓訪，悼念吓趙紫陽，都俾公安打爆眼、扑穿頭，一世人有幾可咁「自由」，可以拆招牌、吐口水、毆打日本人，齊齊開party，好似七月十四盂蘭節咁餓鬼大解放，閻羅王全無追究？
所以深圳河以北，佢有佢示威，羅湖以南，我有我睇日本片，睇日本漫畫，情迷日本化妝品！呢啲就係「一國兩制」嘅偉大，做人通透，現實夾醒定，香港人經歷咁多年開明統治，始終係文明啲！
傳真︰2623-9278
電郵︰[email protected]