將軍澳短期內會有兩個全新樓盤發售，為咗避免攤薄營造已久嘅熾熱入市動力，一先一後推出，基本上係必然嘅事，而煲得比較耐嘅地鐵將軍澳站君傲灣，最快今個月底應市，但係區內代理已經起哄得好緊要，頻頻急call手上嘅客落票，有啲甚至話：「君傲灣我哋可以優先揀樓，入唔入票？」
近年，好多個新盤嘅發售，抽籤揀樓，已經變成最次要嘅行動，或者可以咁講，過往嘅內購，運作模式已經改變咗，𠵱家最重要係，代理鬥快儲客，向發展商攞貨，手頭上愈多客，就可以愈快得到發展商派貨揀樓。至於優先揀樓嘅講法，雖然誇張啲，不過，以部份大行嘅動員能力，某程度上都可以講得通。
講番君傲灣，發展商啱啱講過，入場費係一百八十萬，至於區內最吃香嘅三房單位，聽坊間傳聞，呎價最平都要四千幾銀。
樓市從低位回升，足足超過一年半，唔少地區，樓價已經翻幾番，但係重有唔少意見話，樓價只係升咗少少。
如果同九七比較，可能真係言之成理。
中記吳偉強話，又一村又一居，啱啱錄得連花園特色戶成交，二十八座E室，七百零六呎，成交價五百二十萬，每呎七千三百六十五，係九七年之後新高。點解強調係九七年？原來同類單位，九七年七月份，七百四十一呎連花園，成交價係九百九十萬，呎價一萬三千三百六十，幾乎貴一半咁滯。
咁究竟係𠵱家個價升得太少，定係九七年個價太過癲呢？
樓市興旺，自然萬事皆通，睇乜都順眼啲。話說有個風水大師，俾發展商廣告宣傳吸引，走去參觀新盤示範單位，誰不知唔睇猶自可，一睇就唔買唔得，而且一買就係三伙，咁就盛惠七百幾萬，平均呎價四千八百幾。
點解呢個風水師咁勇進？原來因為喺佢眼中，三個單位充滿風水學上最有利嘅優點，例如未來二十年，香港所行嘅會係西南大運，而嗰三個單位，都係面向西南，重要外望遠海景，即係所謂「西南見水」，財氣迫人咁話。
講咗咁耐，究竟講緊邊個新盤咁巴閉？大角嘴港灣豪庭是也。
近年澳門樓市好似坐咗直升機咁，樓價升到你唔信。好似蘭西有個親戚，幾年前喺筷子基買咗個洋樓單位，當時值二十幾萬，層樓已經有成三十幾年，近排想喺同區買多個單位，一問價，點知同一類單位，已經升到去四十幾萬。澳門當地有好多評論話，因為當地經濟發展潛力雄厚，再加埋條港珠澳大橋，睇怕新樓樓價，遲早追及香港大嶼山東涌市價，即係起碼三千幾銀一呎。
澳門樓市前景無限，香港嘅地產代理管理協會一行二十人，上個禮拜就過咗大海，了解澳門樓市，為日後進軍澳門市場鋪路。
美記主席黃建業前日星期六入馬場，為第二年贊助嘅美聯物業盃賽日，招呼一眾貴賓，嗰日唔少發展商高層，都有出席，黃主席重有幸可以拉頭馬㖭。
當日佢代表美聯慈善基金，損出二十二萬八，畀慈善機構健康快車，由主席方黃吉雯接受支票，為失明人士出一分力。
喺第五場比賽，咁啱由馬主方黃吉雯隻健康特快跑第一，為咗答謝美記嘅善心，馬主特別請埋黃主席一齊拉頭馬。雖然隻馬唔係自己嘅，冇獎金分，不過黃主席一樣咁開心，甚至比馬主笑得更燦爛。
電郵地址：[email protected]
