好多人話，零售股過去兩年在自由行同經濟復甦支持下，不斷反覆炒上，家陣雖然重係受歡迎，但可能因為升得多，已經冇以前咁好炒。但經紀黃就唔係咁睇，佢話只要隻股基本因素好，自然會有捧場客，唔怕炒唔起。
好似上周剛公布04年全年業績的金利來（533），一來盈利增長強勁，比去年勁升52.1％，加上公子坐正，掌管行政總裁一職，預計新一代作風會比以前進取，所以有得諗。
金利來去年盈利6868萬元，末期息每股4仙。金利來業績改善，一來係公司改良產品同店舖設計，提升邊際利潤，二來係金利來中港的地產物業租金收入上升，加上第二代正式掌權，相信金利來以往的老餅形象，將有所改變。
金利來上周五升5.8％，收0.91元，成交金額385萬元。
另外，久違咗嘅仙股英發國際（439），上周五失驚無神大升22.58％，收3.8仙，成交166萬元。經紀陳話，英發的傳聞並無新意，又係傳賣盤。
慕容小初