今個月三十號陳奕迅（Eason）會幫Neway喺數碼港演出音樂會，噚日佢喺尖沙嘴出席記者會，重同一班歌迷坐開篷巴士喺彌敦道遊車河宣傳。
上到巴士Eason好興奮，揸住咪同途人打招呼，重即興叫途人點唱，有人點唱，佢又真係唱，兼做埋旅遊大使，不停用英文講歡迎啲人嚟香港，重叫啲人要喺香港消費。
Eason話個音樂會原本想喺沙灘度搞，不過申請要好耐，所以就打消念頭，佢話：「如果可以喺沙灘搞幾好呢，啲女仔可以着少啲，騷吓身材，我喺台上表演嘅又enjoy，台下睇嘅都enjoy，咁幾好。」
Eason話會唱晒十二首新歌，重會收錄落隻新碟度，咁隻碟就有二十四首歌。講到個女嘅近況，Eason話：「我相信佢同我一樣咁情緒化，因為佢成日又喊又笑。」
何韻詩早前到巴黎為ChristianDior拍攝春夏新裝照，一心諗住去到可以識到金髮靚仔，佢果然得償所願，因為攝影師係靚仔一名，唔知係咪呢個原因，阿詩影相時特別起勁，重用有限嘅法文同人溝通，最後交換埋電話號碼。另外，阿詩話喺街頭茶座親眼見到長達五分鐘嘅法式接吻。
嚴淑明上個禮拜喺台灣做宣傳時短裙突然滑落，成為話題，有人質疑佢係專登走光，搞到佢喊晒咁否認。不過走光事件發生後，嚴淑明就好搶手，個個想宣傳都搵佢，佢下個禮拜就接咗十一個宣傳通告，各大電視台、電台都搵佢，無論走光係有心定無意，佢都一定係贏家。
劉浩龍早前接受港台嘅錄音訪問，講起因為唔願讀書，俾爸爸趕咗出嚟，十幾歲已經一個人住，佢話：「都幾寂寞，返屋企只係見到牆，我希望第時可以同屋企人住。」而佢亦想快啲成家立室，浩龍話：「我都好想有BB，最好三十歲有啦！因為唔想同個細路仔有代溝。我想老婆有內涵、有家教。」
身為「培幼愛心之星」嘅石修同個仔陳宇琛（石仔）噚日去到荃灣城門水塘，出席步行籌款活動。石仔話為咗幫內地學童籌款，佢同爸爸以及樂隊TUX創作咗一首歌《春風》，而且佢哋下個月會去到廣西，參加一間新學校交收儀式。
