David和Bev由美國坐郵輪，先到澳洲後到香港旅遊，Bev對中國菜情有獨鍾，嚟到香港知道可以報名學煮中國菜，二話不說就和老公齊齊報名。一班學員喺廚房雞手鴨腳學煮嘢食，頻呼開心又過癮！
記者：李湘虹 攝影：伍慶泉
示範：中華廚藝學院教導員陸煒師傅
地址：香港薄扶林道145號薄扶林訓練中心綜合大樓6樓
電話：25382229
學煮中國菜最難忘
香港到處都是高樓大廈，夜景更令人難忘。不過令我和老公David最開心的，就是學曉烹調兩道中國菜。
炸鴨卷脆卜卜
第一道菜叫千禧炸鴨卷，咬落口卜卜脆，但就一啲都唔油膩。秘訣係卷內的材料全部都先煮熟，只將薄薄的威化紙炸脆。船友Jane試做時，差啲俾油彈到㖭！
船友最想學拋鑊
另一個船友Linda，佢屋企都有一個中式鑊。見廚師拋鑊好有型，即刻嚷着要學，結果搞到一屋煙！
千禧炸鴨卷
自製價：$30/4人份量
自製時間：半小時
用咩料
燒鴨肉粒 120克
川冬菜粒、甘笋粒、蘆笋粒 各60克
薑茸、葱花 各10克
雞湯 40毫升
生粉 10克
威化紙 8張
麵包糠 40克
雞蛋 2隻
調味料
紹酒 20毫升
甜麵醬 10克
鹽、砂糖、麻油 少許
好易做
1.把冬菜、甘笋、蘆笋汆水備用。爆香薑、葱，倒入鴨肉、甘笋、蘆笋及冬菜兜炒，加雞湯、調味料略煮，埋芡備用。
2.把炒好的材料放在半摺的威化紙橫邊上，對摺後捲成約3吋乘1吋的長條狀。
3.起油鑊至七成油溫，熄火。把包好的鴨卷沾滿蛋液，滾上麵包糠後放入預熱的油鑊中，再開火炸至金黃色即成。
小貼士：
1.威化紙易穿，可於放料前蘸生粉，生粉吸水可防穿孔散開。
2.炸鴨卷必須先預熱油溫，熄火下料再開火炸至金黃，油溫太高或太久取出會變燶。
魚香蝦球
自製價：$70/4人份量
自製時間：45分鐘
用咩料
中蝦/大蝦 250克
薑粒、蒜粒 各7克
中芹粒 10克
泡椒茸、葱花 少許
雞湯 120毫升
酒釀 8克
豆瓣 15克
醃料
鹽、生粉 1克
蛋白 1隻
調味料
鹽、砂糖 適量
紹酒、醋 15毫升
麻油、辣油 10毫升
好易做
1.先把蝦去腸，用鹽、生粉洗淨，晾乾水。
2.用醃料把蝦醃勻，起油鑊拖熟蝦球。
3.另炒香薑、蒜、豆瓣、泡椒、中芹和酒釀，加入雞湯，再下蝦球、鹽、砂糖、紹酒，最後埋芡，收汁後加入麻油、辣油、醋、葱花即成。
小貼士：
蝦落油鑊前先晾乾水，一來易上粉，二來防止出水變嚡口；最好用毛巾包着蝦把水完全索乾。
