灣仔會展檔期拍得住紅館，各類展覽一年到尾密密Show。不過勢估唔到呢啲雲集世界各地參展商Show貨辦、賣大貨的「TradeFair」，竟然吸引到一眾精明師奶落嚟蒲。佢哋專門瞄準展期最後一天，集中最後一小時掃平貨！點解？好似年宵花市咁，參展商不想再付運費將貨辦運回國，大都會以「貨辦價」清倉。記者就在上周末的皮革展，直擊「師奶兵團」瘋狂掃貨！
記者：楊一凡 攝影：楊錦文
師奶醒你：未來必蒲Show
4月21-24日
香港家庭用品展2005
主攻：大小家品由沙發到家居小擺設都有。
4月28日至5月1日
香港禮品及贈品展2005
主攻：不只送人，自己買來觀賞或實用精品乜都有。
6月3-5日
第三十九屆夏日婚紗及結婚用品展
主攻：婚紗、結婚珠寶、美容用品、婚禮禮品及擺設等。
6月3-5日
第六屆美容及健康減肥博覽
主攻：最後賤賣的Mask、唇膏、Cream及美容工具等。
會展網頁查詢：www.hkcec.com.hk/chinese/eventcalendar/event_fair.php
瞄準最後一小時
記者事先在會展的網頁上查到，在4月6日至8日會舉行「亞太區皮革展」，雖然標明只限業內人士參與，但由於網頁內亦詳列出展覽滙集時尚精品如手袋、行李箱、鞋類、皮衣、時尚配飾等，所以我哋估計一定會成為師奶黨出擊目標。
記者在4月8日下午抵埗時，發現非業內人士須付$100入場券，但場內已有為數不少非參展商打扮的「師奶兵團」正在尋找目標。臨近完場一小時，不少皮革參展商陸續在展品上掛上「Sale」紙牌，開始吸引場內其他舖位的參展商過來掃平貨。記者詢問其中一個巴基斯坦籍參展商：「這些貨品不帶回國嗎？」他點頭：「出讓的是部份已在大量生產的貨辦，不太值錢，平價賣出去，既可套現又不用大包細包運回國。」
洋師奶過料：提早一日巡場
手袋皮包檔通常無標明價錢，要開口問價才知，不過價錢僅由二百元起，真皮足料，非花園街貨色可比！忽見洋師奶以極速把九個手袋掃走，記者上前請求Show出其戰利品，原來都是時下最潮皮袋款式，Adele說：「我是行家，可以慳番$100入場費，所以昨天已來揀定款。方法是先跟店方寒暄幾句，交流完一輪意見後，就問他們會帶走手袋嗎？他們說不會，於是我就在昨天乘機預訂，講好今天收檔前，過來買晒。」
港師奶攻略：愈近收檔愈賤價
記者接着遇上的本港師奶掃貨兵團，有的大量入貨卻不願上鏡，肯露面拍照的包括嬌姨、卿姐和貞姐。不過她們卻不願直認來掃貨，說是因為年底會合資開皮革店所以來參觀，最後見有平嘢梗係即時入貨。嬌姨話：「我跟這個印度人傾好入貨時已五點三（六點正展覽正式結束），他們隨即掛牌賣袋，以後將會做拍檔喎，佢哋梗係平畀我啦！」卿姐：「皮褸每檔叫價不一，又無標價，平均$500一件，我好彩執到件只係$350！好笑，佢哋叫價50美元一件，但收錢時計錯數，收我$350。」貞姐：「減價貨款式新，雖然尺碼唔齊，但總會揀到心水，愈近六點愈平。」
行家勸記者：唔好搞亂個Party！
記者現場訪問到一位不願上鏡、在國內做皮革生意的港商：「我本身做國內巿場，但好清楚全球皮袋售價，呢個袋全個真皮，無牌子原價賣一萬蚊個。不過𠵱家好多名牌袋，只得三分二係真皮，都會賣你二三萬蚊啦，𠵱家我只係付二千多元就買了一大一細兩個。」不過，港商晒完料後，又忽然勸喻記者停止採訪：「其實呢啲皮革展屬於行內TradeFair，Trading意味重，最後賤賣的貨品，一定不及Consuming展覽咁多，好似啲美容展收檔時價錢更平，大把香港人嚟掃。我勸你都係唔好亂咁寫出去，費事吸引一大班非業內人士嚟搞亂個場！」
國內行家：自己掃埋一份
記者其後遇上兩名同樣不願上鏡的國內參展商，他們在十五分鐘內已各自在場內掃走五個手袋、三幾件Accessories。「大姐，手袋幾塊錢一個？」「全都是五十塊，有白、紅、黑跟啡的，國內也賣不了這個價錢，而且都是真皮，很軟熟。我本身做皮革，知道是好東西！」
也有例外：皮鞋單腳走
整個皮革展中的真皮鞋館也有特賣，記者打聽到西班牙及德國真皮靴，每對要花兩個月才完成，巿價四百歐羅一對，如果僅兩折不如自己做埋掃貨黨！誰知，一進館只見鞋架精光，滿地大紙箱，記者追問：「真皮鞋不做Sale嗎？」參展商說：「鞋只是睇款，所以我們只帶一隻來，另一隻已飛到別個展館去了。」唉，所以話，靚嘢未必咁易執！
