日本冬季一至三月份嘅日劇啱啱播完，日前日本報章《日刊Sports》公布咗新一輪嘅日劇大獎結果，結果男星瀧澤秀明同女星竹內結子分別憑日劇《義經》同《不高興的遺傳因子》成為最佳男女主角。相反，產後復出、喺劇集《急症群英》裏面做醫生嘅菜菜子就成為網上選舉最差女主角。
瀧澤秀明擔大旗主演的大河古裝劇《義經》，雖然最初唔被睇好，不過今次瀧仔能夠力壓其他對手成為最佳男主角，總算可以鬆一口氣。而竹內結子則憑喺日劇《不高興的遺傳因子》度做研究動物DNA嘅行動學研究生，險勝收視爆燈劇集《我Miss係大佬2》嘅仲間由紀惠。
但喺另一個由日本日劇迷喺網上舉行嘅「金草莓大獎」之中，竹內竟然做咗最差女主角第二名。不過，亦有唔少網友為竹內講好說話，大彈係《不》劇故事沉悶，先會累到竹內攞最差女主角，難怪該劇亦同時被網友選為最差日劇同最差劇本。
至於最差女主角，就由產後復出嘅菜菜子奪得。網友大彈菜菜子喺《急症群英》第三輯飾演醫生每次出場都化行妝，就連喺地震發生後或者喺手術室做手術嗰陣，都同樣保持住一副靚樣，令到劇集毫無緊迫感。原本打算利用上兩輯口碑唔錯嘅《急症群英》打響復出頭炮嘅菜菜子，今次真係失策！