在大嶼山一住十多天，除了擔心拍攝進度之外，也擔心在食方面唔知得唔得，豈料大嶼山卧虎藏龍，食物水準叫人喜出望外。
下榻於銀礦灣酒店，附設的餐廳水準非常不俗，尤其是自助餐，當中包括了印度㗎喱及馬來肉骨茶，比在香港許多專門店吃到的更像樣，每逢周末設有即席燒烤，貪心地吃完一碟又一碟，已有許久未曾吃過自助餐，銀礦灣酒店令我重拾對自助餐的信念，價錢亦相宜，約二百元一位，住客重有得打八折。行多兩步，來到梅窩碼頭前有一個小山坡，開着兩間相連的食肆，本來同行如敵國，一定各施渾身解數爭奪顧客，但這兩間食肆的東主並沒有在門口使出超殷勤式攔截，任由食客自行選擇，由於兩間各有所長，我的選擇是輪流每晚幫襯一間。
「福聚來」的椒鹽雞翼非常香口，小朋友食得興高采烈，叉燒芙蓉炒滑蛋更係送飯佳品，一天辛勞，一碗大白飯伴炒滑蛋，滿足矣。特別推介特價海鮮豉汁蒸黃鱲䱽，$88一條夠份量，吮盡魚骨再用汁撈飯，吃得碟底朝天。「德仔記」事頭婆介紹蒜茸斬件蒸海魚，又香又滑，才百多元一條，香港點都食唔到。最令人嘩一聲的是招牌當紅炸走地雞，皮炸得像片皮鴨一樣鬆化香脆，雞隻多空間走動，皮與肉之間不留脂肪，雞肉嚼之有勁兼有雞味，連雞胸白肉也柔軟不起渣，誠之為一隻靚雞。
「福聚來」與「德仔記」的共同之處是兩間食肆的經營者都非常尊重自己的工作，樓面乾淨、食物美味兼夠鑊氣、不同顏色的枱布及壁畫添上許多生命力、工作人員笑容滿面兼對自家出品充滿信心。簡單說句，有時間我必定會再回去幫襯。