飯局上碰到博學多才嘅岑逸飛，飛哥大談控制糖尿病之道。飛哥有糖尿病，不是新聞，佢自己在專欄講過，所以左丁山唔係爆佢私隱。聽飛哥講，患此病須要小心照料，日日量度體內血糖，血糖過高，除非持續幾個禮拜，否則不會有生命危險，但血糖低，低至兩度，就要去見鄧小平，患糖尿病者如果覺得自己身體冷、冒白汗，就要千萬小心。岑太經常陪伴飛哥左右，手袋永遠帶着一包黑朱古力，就係要畀飛哥補充體內糖份，不過飛哥話：「最快速補充糖份嘅方法，就係飲一罐可樂。」咦，咁講法，其他人冇糖尿病者，多飲汽水，可能為自己帶來過多糖份。
血糖過高就要打針，飛哥識得自己向腹部打針不求人，岑太係護士出身，當然係打針專家，但係醫生不鼓勵病人自己打針，除非病人嘅醫療常識豐富啦。飛哥雖然坐輪椅，已行十萬里路，係香港文化旅遊第一人，暫時好似係未去過非洲南美洲啫。去旅行又點呢？飛哥話一啲常識淺薄嘅航空公司因反恐保安關係，堅決唔畀佢帶住針筒上機，幾經交涉，就會由空中小姐?少爺代管，反而歐美航空公司比較體貼，知道糖尿病人嘅需要，准佢帶針筒放落手提行李度。
飛哥讀書廣博，精通佛經，眾老友覺得佢愈來愈似一尊活佛，頭大面圓，膚色紅潤，皮膚滑溜，彌勒佛笑面迎人，都係此副模樣，一啲都唔似被糖尿困擾。飛哥教我哋平時多食涼瓜，或飲涼瓜煲水，可降血壓，減血糖。涼瓜又稱苦瓜，到藥材舖買苦瓜乾，五蚊有一大包，可煲水十次八次，味甘不苦。一般藥材舖之苦瓜乾弊在唔乾淨，混有黃泥，一定要用心清洗幾次先至可以煲。想講究，可到Ｗ小姐嘅中環大寶號Ｂ記買越南苦瓜乾，色綠，十分乾淨，用凍水一沖就可以落煲。價錢當然貴好多，二十蚊有一盒，慳慳哋可以煲五次。