食自助餐總有種入戰場作戰的感覺，既要在有限時間內讓肚皮得到最大滿足，又要想盡法寶與人搶食，但世事無絕對，上周六終於俾我搵到間可以優哉游哉地歎個漫長Buffet的佳地。這餐廳酒吧逢周六正午十二點至五點半，都會提供長達五個半小時的LunchBuffet，場內還有LiveBand坐鎮，有埋音樂送飯，一於Hea盡330分鐘至好走！
記者：黃婉冰 攝影：陳陶鈞
聽LiveBand送飯
周六歎Buffet
前身是「onebar+grill」的「OneBar」，已由FineDinning傳統餐廳變身成今日的酒吧餐廳，新搞作推出周六悠長自助午餐，老實說賣點不在甚麼小吃、點心、甜品或果汁，而是那五個半小時超加長版享用時間。五個半小時，總計330分鐘，慢慢食唔使爭，食飽攤唞完再食過，絕對挑戰你的胃容量！營運經理Nick話呢個係全新飲食新概念，希望客人可如歐洲人一樣，慢慢進餐消磨整個下午，所以話飽到食唔落肚都無所謂，一於長枕狂Hea，聽埋餐廳LiveBand演奏至好走。
周一至五食飯劈酒HappyHour
周一至周五回復餐廳及酒吧角色，一邊廂酒吧會提供快捷方便的SetLunch，另一邊餐廳提供滲入摩登製法的傳統經典菜，兩種Style切合不同的上班族。晚上六時開始，「OneBar」會正式分成酒吧及餐廳，喜歡的話，可以先到餐廳祭五臟廟，頭盤、沙律、意大利麵、薄餅瓣瓣齊，當中扒類最值一試，8款特色海鮮、肉類任揀兼自行選配的醬汁及配菜，即叫即Grill，食飽再過隔籬吧劈酒，逢周三至六有LiveBand演奏爵士樂，足不出戶可玩足一晚。
豉汁蒸帆立貝
新鮮帆立貝（帶子）加豉汁、葱花清蒸，簡單傳統中式做法，鮮味十足。
魚生
三文魚、吞拿魚魚生刻意切成細細件，一口一件不失儀態，食多一兩件都唔會飽。
雞肉迷你漢堡包、燒羊肉三文治
前者內餡有烤雞、牛肉兩款；以薄片烤羊肉做成的OpenSandwitch，加羊肉燒汁，是另一飽肚之選。
鮮果千層酥
經典法式甜品，兩層分別是藍莓及桑莓，啖啖鮮果酸香，女士們頭號目標。
即製棉花糖
Buffet罕見即製棉花糖，至啱小朋友，細細支，幾啖食晒，少食多滋味嘛。
其他精選
智利鱸魚扒配扒雜菜$220
鱸魚扒肉質鮮嫩，不加調味料Grill至剛熟，配檸檬橄欖油汁，把魚肉鮮味帶出，配菜之一的扒雜菜，味道較清惹味，是不錯的配搭。
澳洲羊扒配炒雜菌$220
澳洲羊扒配紅酒燒汁，香濃燒汁配鮮嫩羊肉，肉味豐富，再配上同樣帶有香濃菇味的炒雜菌，味道濃郁。
HeartBeat$70
用荔枝甜酒加Tequila、熱情果汁、新鮮熱情果子調校，酒味較濃，小心飲過了頭！
買手信繼續Hea
OneBar（25222246）
地址：中環干諾道中8號交易廣場一期3樓
營業時間：星期一至五12:00pm至10:00pm，星期六12:00pm至5:30pm，星期日休息。
自助餐收費：成人$150，小童$75。（加一服務費）
座位：160個
