千呼萬喚始出來嘅數記王牌902SH，雖然嚟到香港俾人連個名都改埋，不過氣勢真係強勁。就連基仔隔籬屋個阿叔，都扯住基仔係咁問。之但係與此同時，基仔就連環收到幾個老死嘅Call，個個都好似想殺人咁款，猛咁同基仔講話唔出SX813，基仔喺平息民怨嘅同時，亦都問發生咩事。原來佢哋都係去數記出SX813，搞到一肚氣返嚟！老死一個Case就係諗住帶Number過台，點知Sales姐姐就要佢先畀錢，三日後正式帶個Number過台，先返嚟拎機。而老死二就本身用開數記，重要佢Show地址證明，唔係就要放低$2,100按金！兼且如果身懷兩張約，就唔可以出SX813！嘩，真係世界變，完全唔憂賣咁款，諗極都唔明，點解搞咁多花臣留難啲客呢！
200萬像素手機插水
呢期用咩手機先最潮？基仔就話起碼都要有番個200萬像素鏡頭先夠撐，最好就梗係SX813啦，不過大嗱嗱成6千蚊部機，基仔就真係有心無力啦。惟有諗住拎手頭上用緊部三菱M900去「吹煙」喇，點知去到手機舖問一問個價，當堂連最後希望都幻滅埋。因為回收價都只係得嗰兩千蚊，都唔知夠買SX813個鏡頭好、定係買個CGSilicon好。跟住同個Sales傾傾吓，佢就話呢期200萬像素手機個回收價全部插水，NECN840都係收得兩千鬆啲，M900就更加唔使講喇。真係估唔到，話晒都係200萬像素鏡頭，賣番出去竟然平過唔少百萬像素機。
文：尹謹基