大美人李嘉欣前晚往半島酒店出席法國名牌YSL的春夏時裝展，她表示很捨得花錢買名牌衫，並笑言買衫是推動她努力賺錢的原動力。但對人生大事婚禮，她寧願愈簡單愈好，婚紗裙褂可免則免，她指結婚如同做騷，他日結婚定必保密。
李嘉欣前晚以特別嘉賓身份往半島酒店，出席法國名牌YSL的春夏時裝展，嘉欣穿上一件從巴黎運抵本港的桃紅色波浪邊裙子出現，她自言很捨得花錢置裝，但指YSL的服裝價錢昂貴。
李嘉欣說：「買名牌衫係𠱁自己開心嘅原因之一，亦係推動我努力賺錢嘅原動力，啲衫過季我就會賣出去做慈善，舊嘅唔去新嘅唔嚟吖嘛。我最貴嘅一件衫用咗十幾萬，係用嚟年前參加康城影展時着嘅。」
問李嘉欣捨得花錢置裝，對人生大事婚禮會不會盛大鋪張？她說：「一定唔會，我結婚一定唔會着婚紗，裙褂更加冇可能。我諗鍾意我嘅男人都唔會迫我做啲我唔願做嘅事，而且婚禮又要換衫又要俾人玩，好似做騷咁。如果我結婚，嗰日一定冇人知，一來我唔會公告天下，二來嗰日我好可能好似平時咁，着牛仔褲或者運動裝，冇人知嘅。」
此外，剛從日本旅行回港的雷兆光夫婦，亦是時裝展的座上客，雷林靜怡表示為彌補這次沒有帶女兒出門，特別花了數千元買BB衫給她，一返抵家即抱抱女兒，但兒子即時呷醋，並打了母親手臂一下。
採訪：RitaLeung
攝影：EdwardChou
